विगत एक दशकदेखि कलाकर्ममा सक्रिय युवा कलाकारद्वय दलबहादुर गुरूङ र अमृतबहादुर कार्की सृजनशील युवा कला पुरस्कारबाट सम्मानित हुने भएका छन्। उनीहरूलाई शनिबार सृजनशील कलाकार समूहले जनही १० हजार रुपैयाँसहित ताम्रपत्रले सम्मान गर्दैछ।
गुरुङलाई वर्ष २०७६ को पुरस्कार दिन लागिएको हो भने कार्कीलाई वि.सं. २०७७ को। समूहका संयोजक दुर्गा बरालद्वारा हस्ताक्षरित प्रेस विज्ञप्तिअनुसार गण्डकी प्रदेशका मुख्यमन्त्री कृष्णचन्द्र नेपालीको प्रमुख आतिथ्यमा पुरस्कार वितरण गरिनेछ।
पोखराका स्थापित कलाकार विश्वरत्न शाक्यले पिता सिद्घिरत्न तथा माता सेतुलीमायाको स्मृतिमा ‘सृजनशील युवा कला परस्कार’ स्थापना गरेका हुन्। यसको सञ्चालन तथा वितरण सृजनशील कलाकार समूहले गर्दै आएको छ।
पुरस्कार छनोट समिति संयोजक अगुवा कलाकार लोकप्रसाद गुरुङ हुन् भने सदस्यहरूमा दुर्गा बराल, मिलन शेरचन, गोपाल श्रेष्ठ र सदस्य झविन्द्र गुरुङ छन्।
