नेप्से परिसूचक दोस्रो दिनपनि बढेको छ। मंगलबार दोहोरो अंकले बढेको बजार आज ६.४१ अंकले बढेको हो।
आज नेप्से ०.३५ प्रतिशतले बढेर १८३७.४६ बिन्दुमा पुगेर बन्द भएको छ।
यस दिन २२१ वटा धितोपत्रको ४८ करोड ५४ लाख ८ हजार ७६८ रुपैयाँ बराबरको कारोबार भएको छ।
दसैं लागेसँगै कारोबार रकममा ह्रास आउन थालेको छ। कारोबार रकम दिनहुँ घटिरहेको छ। मंगलबार ६६ करोड ३० लाख १३ हजार रुपैयाँ बराबरको कारोबार भएको थियो।
बुधबार मन्दाकिनी हाइड्रोपावरको सेयर मूल्य सर्वाधिक ९.२० प्रतिशतले वृद्धि भएर ३७४ रुपैयाँमा बन्द भएको छ।
त्यस्तै, अभियान लघुवित्तको सेयर मूल्य ८.१९ प्रतिशतले बढेको छ। उक्त कम्पनीको सेयर मूल्य ३९८ रुपैयाँ ९० पैसा पुगेको छ।
यस दिन सेयर मूल्य सर्वाधिक घट्नेमा ग्लोबल आइएमई ब्यालेन्स फण्ड रहेको छ। सो फण्डको मूल्य १० प्रतिशतले घटेर प्रति इकाई मूल्य ९ रुपैयाँमा झरेको छ।
त्यस्तै, राप्ती हाइड्रोको सेयर मूल्य ६.०६ प्रतिशतले घटेर प्रतिकित्ता मूल्य २१७ रुपैयाँ कायम भएको छ।
यस दिन सर्वाधिक सेयर खरिद–बिक्री नेशनल माइक्रोफाइनन्स लघुवित्तको भएको छ। कम्पनीको ४ करोड ७५ लाख रुपैयाँ बराबरको सेयर खरिद–बिक्री भएको हो।
कम्पनीको सेयर मूल्य प्रतिकित्ता १ हजार १५२ रुपैयाँ कायम भएको छ।
सर्वाधिक सेयर खरिद–बिक्री हुने दोस्रो सूचीमा नबिल बैंक रहेको छ। उक्त बैंकको ७६७ रुपैयाँमा २ करोड ६९ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये चार समूहको परिसूचक घटेको छ भने बाँकी नौ समूहको परिसूचक बढेको छ।
व्यापार समूहको परिसूचक ०.२४ प्रतिशत, वित्त समूहको परिसूचक ०.२६ प्रतिशत, अन्य समूहको परिसूचक ०.२३ प्रतिशत र म्युचुअल फण्ड समूहको परिसूचक ०.४३ प्रतिशतले घटेको छ बाँकी सबै समूहको परिसूचक बढेको छ।