स्मार्टच्वाईस टेक्नोलोजिज लिमिटेड (एससिटी) तथा नेपाल क्लियरिङ हाउस लिमिटेडबीच नेसनल पेमेन्ट स्वीच मार्फत् क्युआर अन्तरआबद्धता कायम गर्न सम्झौता भएको छ।
सम्झौता पत्रमा एससिटीका तर्फबाट संस्थाका प्रमुख कार्यकारी अधिकृत नारायण प्रकाश भुँजु तथा एनसिएचएलका तर्फबाट संस्थाका प्रमुख कार्यकारी अधिकृत नीलेश मान सिंह प्रधानले हस्ताक्षर गरेका छन्।
हस्ताक्षर कार्यक्रममा नेपाल राष्ट्र बैंकका भुक्तानी प्रणाली विभागका कार्यकारी निर्देशक गुरुप्रसाद पौडेल, नेपाल राष्ट्र बैंकका अन्य पदाधिकारीहरू, एससिटी तथा एनसिएचएलका सञ्चालक समितिका सदस्यहरूको उपस्थिति थियो।
एससिटी तथा एिसीएचएल बीचको यो सम्झौताले क्युआर सम्बन्धी भुक्तानीलाई थप प्रोत्साहन गर्ने विश्वास गरिएको छ।
उक्त सम्झौतापश्चात स्मार्ट क्युआर उपलब्ध रहेका मोबाइल बैंकिङ वा वालेटका ग्राहकहरुले नेपाल-पे क्युआरका मर्चेन्टहरूलाई क्युआर स्क्यान गरी भुक्तानी गर्न सक्नेछन्। त्यसै गरी नेपाल-पे क्युआर उपलब्ध रहेका मोबाईल बैंकिङ, वालेट वा कनेक्ट आइपिएसका प्रयोगकर्ताले स्मार्ट क्युआर मर्चेन्टहरूलाई भुक्तानी गर्न सक्नेछन्।
यसरी ग्राहकहरुलाई दुवै नेटवर्क भित्रका क्युआर सम्बन्धी भुक्तानी गर्न सहज हुने छ भने बैंक वित्तीय संस्था तथा भुक्तानी सेवा प्रदायक संस्थाहरूलाई पनि छुट्टै मर्चेन्ट आबद्ध गराउन आवश्यक हुने छैन।
हाल नेपाल-पे क्युआरमा ७० हजार भन्दा बढी र स्मार्ट क्युआरमा १ लाख ६० हजारभन्दा बढी मर्चेन्टहरू आबद्ध छन्।
नेपाल क्लियरिङ हाउसले कार्यान्वयनमा ल्याएको नेसनल पेमेन्ट स्वीच अन्तर्गत नेपाल–क्युआर स्ट्याण्डर्ड अनुसारको क्युआर अन्तरआबद्धता कायम गर्ने गरी नेपाल-पे क्युआर सञ्चालनमा ल्याइएको हो।
नेसनल पेमेन्ट स्वीचका निम्ति हाल हालसम्म ५७ वाणिज्य बैंक, ५ विकास बैंक, १२ फाइनान्स कम्पनी तथा १३ भुक्तानी सेवा प्रदायकले सम्झौता गरिसकेका छन्।
विगत २० वर्षदेखि नेपाली मन र मुटुमा राज गर्दै आएको एससिटीले एससिटी युपिआइ कार्ड, स्मार्ट क्युआर, फास्ट बैंकिङ, एससिटी एनपे लगायतका भुक्तानी सुविधा प्रदान गर्दै आएको छ। एससिटीले वाणिज्य बैंक, विकास बैंक, फाइनान्स कम्पनी तथा भुक्तानी सेवा प्रदायक लगायत विभिन्न संस्थालाई भुक्तानी सम्बन्धी विभिन्न माध्यमहरू प्रादान गर्दै आएको छ।