नेपाल विद्युत प्राधिकरणको सहायक कम्पनी चिलिमे जलविद्युतको अगुवाइमा रसुवामा निर्माण भएको रसुवागढी जलविद्युत आयोजना आंशिक सञ्चालनमा आएको छ।
गत असार २४ गते चीनको तिब्बतबाट बग्ने ल्येन्दे खोलामा हिमताल विष्फोटनबाट आएको बाढीले आयोजनाको बाँध लगायतका संरचना (हेडवर्क्स) मा ठूलो क्षति पुर्याएको थियो।
हेडवर्क्स मर्मतपछि अस्थायी रूपमा नदीबाट पानी डाइभर्सन गरी विद्युत गृहमा रहेका तीनवटा युनिटमध्ये एउटा युनिट शनिबारबाट सञ्चालनमा ल्याइएको हो। एक सय ११ मेगावाट जडित क्षमताको आयोजनाको एउटा युनिटबाट ३७ मेगावाट विद्युत उत्पादन हुन्छ।
बाँकी दुइटा युनिट एक महिनाभित्र संचालनमा ल्याउने र हेडवर्क्स क्षेत्रको बाँकी मर्मत कार्य आगामी वर्षायाम अगाडि नै सम्पन्न गर्ने गरि पुनर्निर्माणको काम भइरहेको प्राधिकरणका कार्यकारी निर्देशक मनोज सिलवालले बताए।
कार्यकारी निर्देशक सिलवालले प्राधिकरण, चिलिमे र रसुवागढी हाइड्रोपावर कम्पनीका पदाधिकारी तथा कर्मचारीको अथक प्रयास र मेहनतबाट क्षति पुर्याएका संरचनाको मर्मत गरी आयोजना सञ्चालनमा ल्याउन सफल भएको उल्लेख गरे।
उनले भने, 'आयोजनाबाट विद्युत उत्पादन सुरू भएपछि हिउँदयामको विद्युत माग व्यवस्थापन गर्न केही सहज हुनेछ।'
बाढीले आयोजनाको हेडवर्क्स क्षेत्रमा पानीसँग बगेर आउने काठ, झार, बोटबिरूवाजस्ता वस्तु रोक्ने मेसिन, गेटलगायतका उपकरण बगाएको थियो।
हेडवर्कस नियन्त्रण लगायतका भवनमा दुई मिटरभन्दा बढी लेदो थुप्रिएको थियो। जहाँ ठूला ठूला ढुंगा आएका थिए। पानीलाई सुरूङतर्फ पठाउन बनाएका संरचना भत्किएका थिए। साथै, विद्युत उत्पादनपछि नदीलाई पानी पढाउन प्रयोग हुने टेलरेसबाट पानी बसेर टर्वाइन रहेको तला पूर्ण रूपमा डुबेको समेत आयोजनाले जनाएको थियो।
उक्त दिन जलविद्युत आयोजनामा कार्यरत २२ जना कर्मचारीहरूलाई हेडवर्क्स क्षेत्र र आवास क्षेत्रबाट सेनाको हेलिकोप्टरबाट उद्दार गरिएको थियो। कर्मचारी आवास क्षेत्र पूर्णरूपमा बगाएको थियो।
बाढीका कारण आयोजनालाई मात्र नभई स्याफ्रुबेँसीबाट आयोजना स्थलसम्म जाने मुख्य राजमार्ग पहिरोबाट विभिन्न ठाउँमा अवरोध भएको थियो।
आयोजनाबाट १६ पुस २०८१ बाट व्यवसायिक रुपमा विद्युत उत्पादन सुरू भएको थियो।
तर, असारमा आएको बाढीले क्षति पुर्याएपछि आयोजनाबाट विद्युत उत्पादन बन्द थियो। आयोजना पूर्णरूपमा सञ्चालनमा आएपछि वार्षिक ६१ करोड ३८ लाख ७५ हजार युनिट विद्युत उत्पादन हुने छ।
उक्त विद्युत बिक्रीबाट कम्पनीलाई वार्षिक तीन अर्ब २५ करोड रूपैयाँ आम्दानी हुने उल्लेख गरिएको छ।
-1746009348.jpg)
