स्वास्थ्य तथा जनसंख्या मन्त्री विरोध खतिवडाले मन्त्री परिवर्तन गर्ने पार्टीको निर्णय कार्यान्वयन हुने बताएका छन्।
आज बसेको पोलिटब्यूरो बैठकपछि पत्रकारहरूसँग संक्षिप्त कुराकानी गर्दै स्वास्थ्य मन्त्री खतिवडाले पार्टीको निर्णय कार्यान्वयनमा जाने बताएका हुन्।
अहिले सरकारमा रहेका एकीकृत समाजवादीका मन्त्रीहरू राष्ट्रिय सभाबाट बजेट पारित भएपछि हट्ने र ती ठाउँमा पार्टीले निर्णय गरेअनुसार नयाँ मन्त्रीहरू जाने उनको भनाइ छ।
उनले १० जना सांसदहरूले पार्टी अध्यक्ष माधवकुमार नेपाललाई चित्त नबुझेका कुरा ध्यानाकर्षण गराएको पनि बताएका थिए।
‘मन्त्री छाड्न तयार छौं। शतप्रतिशत छाड्छौं,’ उनले भने, ‘हामी मन्त्री छाड्न तयार छ भनेर लेखेर पनि पार्टीलाई दिइसकिएको छ।’ राष्ट्रिय सभाबाट बजेट पारित भएपछि आफूहरूले स्वत: मन्त्री छाड्ने खतिवडाले बताएका छन्।
गत जेठ २२ मा एकीकृत समाजवादीले मन्त्री फेर्ने भने पनि अहिलेसम्म कार्यान्वयनमा आउन सकेको छैन।