एकीकृत समाजवादीको केन्द्रीय कमिटी बैठक
नेकपा एकीकृत समाजवादीले पाँच दलीय गठबन्धन बाहेकका दलसँग पनि सहकार्य खुला गर्ने भएको छ।
शनिबार काठमाडौंको बानेश्वरमा बसेको केन्द्रीय कमिटीको बैठकले पाँच दलीय गठबन्धनसँग सहकार्य जारी नै राख्ने तर शरण नपर्ने प्रवक्ता जगन्नाथ खतिवडाले जानकारी दिए। उनले बैठकपछि पत्रकारहरूलाई निर्णय सुनाउँदै सो कुरा बताएका हुन्।
‘गठबन्धनको विषयमा पाँच दलीय गठबन्धन सबैसँग सहकार्य गर्छौं तर शरण पर्दैनौं। सहकार्य गर्न हामी खुला छौं,’ उनले भने,‘सबै दलसँग छलफल खुला गर्छौं। पाँच दलीय गठबन्धन हाम्रो प्राथमिकता हो। तर पाँच दल बाहेकका दलहरूसँग पनि खुला छलफल गर्नेछौं।’
यस्तै एकीकृत समाजवादीकै पहलकदमीमा बामपन्थी शक्तिहरूको ध्रुव सिर्जना हुनसक्ने पनि उनले बताए।
‘देशभक्त र बामपन्थीहरू बीचमा व्यापक सहकार्यको सम्भावना भएको कुरा देख्न सकिन्छ। यसबारेमा पनि हामी बहस छलफल गर्न सबै राजनीतिक दलहरू, व्यक्ति व्यक्तिसँग, समूह समूहसँग भेट्न तयार छौं,’ उनले भने, ‘हाम्रो पहलमा देशभक्त बामपन्थी लोकतान्त्रिक शक्तिहरूको ध्रुव सिर्जना हुनसक्छ। हामी सबैलाई समेटेर देशको हितको रक्षाका लागि देशको लोकतन्त्र संविधानको रक्षाको लागि हाम्रो पहल कदमीमा हामी अगाडि बढ्न सक्छौं।’