नेकपा एमालेका उपाध्यक्ष विष्णु पौडेलले कम्युनिष्ट पार्टीमा लागेकाहरूले पद प्राप्ति नै सबैथोक हो भन्ने प्रवृत्ति त्याग्नुपर्ने बताएका छन्।
पद प्राप्तिका लागि जे पनि गर्न तयार हुने प्रवृत्तिले कम्युनिष्ट पार्टीभित्र विचलन देखिएको पौडेलको भनाइ छ।
जीवराज आश्रित स्मृति प्रतिष्ठान नेपाल बुटवलले बुधबार बुटवलमा आयोजना गरेको समृद्ध नेपाल सुखी नेपालीको सपनाभित्र जीवराज आश्रितको दृष्टिकोण विषयक विचार गोष्ठीमा बोल्दै नेता पौडेलले कम्युनिष्टहरूले त्याग र विचारको राजनीतिक संस्कार पनि सिक्नुपर्ने बताए।
माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधव नेपालप्रति लक्षित गर्दै उनले पदका लागि नै शक्तिशाली कम्युनिष्ट पार्टी विभाजन गरिएको दाबी गरे।
‘कम्युनिष्ट पार्टी विभाजित हुनुमा दलीय लालचाबाहेक अरू केही थिएन, शक्तिशाली अवस्थामा पुगेको कम्युनिष्ट पार्टीलाई पदका लागि विभाजन गर्नु दुर्भाग्यपूर्ण थियो’,उनले भने।
पौडेलले स्वर्गीय आश्रितबाट अहिलेका समकालीन नेताहरूले पार्टीमा उनको योगदान, त्याग र विचारको राजनीतिक संस्कार सिक्नुपर्ने बताए।
‘जीवराजका बहुआयामिक योगदान छन्, कम्युनिष्ट आन्दोलनमा लागेकाहरूले उहाँबाट त्याग र विचारको राजनीति सिक्नुपर्छ, तबमात्रै कम्युनिष्ट पार्टीले लिएको लक्ष्य र उद्देश्य पूरा हुन्छ’,उपाध्यक्ष पौडेलले भने।
कार्यक्रममा त्रिभुवन विश्वविद्यालयका प्राध्यापक अचलराज पाण्डेले समृद्ध नेपाल सुखी नेपालीको सपनाभित्र जीवराज आश्रितको दृष्टिकोण विषयक कार्यपत्र प्रस्तुत गर्दै अहिलेको पुस्ताले आश्रितका योगदानबारे थाहा पाउन र बाटो पछ्याउन आवश्यक रहेको बताए।
‘मुलुकको आर्थिक अवस्था र समुन्नत समाज निर्माणका लागि आश्रितले अपनाएको दृष्टिकोण अहिले पनि उत्तिकै सान्दर्भिक छ,’ पाण्डेले भने।