नेपाल बार एशोसिएसनले सवारी साधनको नम्बर प्लेटमा अंग्रेजी भाषाको प्रयोग संवैधानिक व्यवस्थाको मर्म र भावना विपरित भएको भन्दै नेपाली भाषाकै प्रयोग गर्न सुझाव दिएको छ।
साउन १४ गते बसेको नेपाल बारको केन्द्रीय कार्यसमितिले नेपाली भाषा अर्थात देवनागरी लिपिमा नम्बरप्लेट लेख्न माग गर्ने निर्णय गरेको भन्दै बिहीबार विज्ञप्ति निकालेको छ।
‘सवारी तथा यातायात व्यवस्था विभागबाट सवारी साधनको नम्बर प्लेटमा अंग्रेजी भाषाको प्रयोग गरिनु संवैधानिक व्यवस्थाको भावना र मर्म प्रतिकूल छ। जुनसुकै तर्क वा आधार र कारणमा पनि संविधानले आत्मसाथ गरेको भाषालाई प्रतिस्थापन गर्ने गरी प्रत्यक्ष वा परोक्ष रुपमा कुनै पनि कार्य गर्न मिल्दैन,’ नेपाल बारले भनेको छ, ‘विभागबाट प्रदान गरिने सवारी साधनको नम्बर प्लेटमा नेपाली भाषा (देवनागरी लिप) मा लेख्नु पर्ने को अनिवार्य व्यवस्था गरिनु पर्दछ भनि नेपाल बार एशोसिएशन नेपाल सरकार लगायत सम्बन्धित निकायसँग जोडदार माग गर्दछ।’
यसैबीच सरकारले इम्बोस्ड नम्बर प्लेट नेपालीमा राख्ने प्रक्रिया सुरू गरेको छ। यसबारे हाल छलफल भइरहेको भौतिक पूर्वाधार तथा यातायात मन्त्रालयका सहसचिव शिवप्रसाद नेपालले जानकारी दिए।
प्लेटको भाषा सम्बन्धमा कानुन मन्त्रालयमा रायका लागि पत्राचार गरिएको उनले बताए।
'यसमा तीन वटा कुरा चाहिन्छ। एउटा कानुनी संशोधनको कुरा छ। अर्को ठेक्का भइसकेको विषयमा संशोधन गर्नुपर्ने हुन्छ जसमा दुइटै पक्ष (ठेक्का पाएको कम्पनी र नेपाल सरकारको) सहमति हुनुपर्छ। त्यसपछि लागतको कुरा पनि आउँछ,' उनले सेतोपाटीसँग भने।
कानुन संशोधन, ठेक्का संशोधन तथा लागतको कुरा मिले देवनागरी लिपिमै प्लेट बनाउन सकिने उनले बताए।
इम्बोस्ड नम्बर प्लेट देवनागरी लिपिमा बनाउन माग राख्दै सडकदेखि सदनसम्म आवाज उठिरहेको छ। भाषाविद्हरूले अंग्रेजीलाई प्रश्रय दिन देवनागरीलाई पन्छाएर अंग्रेजी भाषा प्रयोग गरिएको आरोप लगाउँदै आएका छन्। आवाज उठ्न थालेपछि मन्त्रालयले यो विवाद टुंग्याउन खोजेको सहसचिव नेपालको भनाइ छ।
'कसरी जान सकिन्छ भनेर राय र सुझाव लिइरहेका छौं। बाहिर हल्ला भएजस्तो नेपालीमै बनाइहाल्ने निर्णय भने भइसकेको होइन,' उनले भने।
