नेकपा एमालेका उपाध्यक्ष सुवासचन्द्र नेम्वाङले सरकारले प्रमुख प्रतिपक्षी दल एमालेसँग कुनै छलफल नगरि निर्वाचनको मिति घोषणा गरेको आरोप लगाएका छन्।
एमालेले समयमै निर्वाचन घोषणा गरिनुपर्छ भन्दै आएको र निर्वाचन आयोगले पनि समयमै निर्वाचन गर्न सल्लाह दिईरहेकोले सरकारले निर्वाचनको मिति घोषणा गरे पनि सबै दलहरुसँग छलफल गर्नुपर्ने नेम्बाङले बताए।
प्रेस चौतारी नेपाल रूपन्देहीले बिहीबार बुटवलमा आयोजना गरेको पत्रकार भेटघाटमा बोल्दै उपाध्यक्ष नेम्वाङले सरकारले विगतमा गर्ने निर्णय जस्तै निर्वाचन घोषणाको निर्णय पनि सुटुक्क र छापामार शैलीमा गरेको टिप्पणी गरे।
‘निर्वाचनको मिति घोषणा हुनुपर्थ्यो, भयो। राम्रो भयो, तर सरकारले विगतका निर्णयहरु जसरी सुटुक्क, छापामार शैलीमा निर्णय गर्थ्यो अहिले पनि त्यसैगरि निर्णय गर्यो, यसपटक पनि त्यस्तै भयो हामीसँग छलफल भएन,’ नेम्वाङले भने।
उनले आफूहरूसँग सल्लाह नगरे पनि तोकिएको मितिमा निर्वाचन गर्न एमालेले सहयोग गर्ने बताए।
निष्पक्ष, स्वच्छ र भयरहित वातावरणमा समयमै निर्वाचन गर्न सरकारलाई उनले आग्रह गरे। ‘हामीलाई नसोधिए पनि निर्वाचनको मिति घोषणा भयो। निर्वाचन हुने भयो भनेर हामी खुसी छौं, सरकारले स्वच्छ, निष्पक्ष र भयरहित वातावरणमा निर्वाचन गर्नुपर्छ,’ नेम्वाङले भने।
नेम्वाङले अहिलेको सत्ता गठबन्धन संसदीय मूल्य र मान्यता विपरितको दुषित गठबन्धन भएको बताए। अहिलेको गठबन्धनलाई संसदीय प्रणालीका मूल्य र मान्यताबारे कुनै पनि जानकारी नभएको उनले दाबी गरे।
‘प्रमुख प्रतिपक्षी दल भईरहँदा अहिले पनि सबैभन्दा धेरै मत प्राप्त गरेर देशको ठूलो दल एमाले हो, प्रमुख प्रतिपक्षी दल राज्यको अभिन्न अंग पनि हुन्छ, निर्वाचन जस्तो महत्वपूर्ण विषयमा हामीसँग मात्र होईन अन्य दलसँग पनि छलफल गरिनुपर्थ्यो,’ उनले भने।
नेता नेम्वाङले सत्ता गठबन्धन एमाले विरूद्ध जतिसुकै लागे पनि जनताले निर्वाचन मार्फत दुधको दुध र पानीको पानी छुट्याईदिने बताए।
निर्वाचन घोषणा भइसकेपछि अब जनताले फैसला गर्ने भन्दै उनले आफूहरू निर्वाचनको तयारीमा जुटिसकेको बताए।
‘हामी निर्वाचनको तयारीमा जुटेका छौं, एमाले बैंक खाता सहित निर्वाचनको मैदानमा उत्रिने छ, फैसला जनताले गर्ने छन्’, उनले भने।
