रोल्पामा ट्रयाक्टर दुर्घटना हुँदा चालक र सहचालकको मृत्यु भएको छ।
ट्रयाक्टर दुर्घटना हुँदा दाङको तुलसीपुर उपमहानगरपालिका वडा नं. ७ का ट्रयाक्टरका चालक २९ वर्षीय आशाराम चौधरी र रोल्पा जिल्लाको गंगादेव गाउँपालिका वडा नं. १ निवासी १८ बर्षीय सहचालक डम्मरबहादुर ओलीको घटनास्थलमै मृत्यु भएको प्रहरीले जानकारी दिएको छ।
रोल्पाको घर्ती गाउँबाट ओततर्फ बालुवा बोकेर जाँदै गरेको रा १ त १५०७ नम्बरको ट्रयाक्टर बुधबार बेलुका ८ बजेतिर दुर्घटना हुँदा उनीहरूको घटनास्थलमै मृत्यु भएको जिल्ला प्रहरी कार्यालय रोल्पाले जानकारी दिएको छ। उक्त ट्रयाक्टर दुर्घटना रोल्पाको माडी गाउँपालिका वडा नं. १ धारावाङ भन्ने स्थानमा भएको र राति अबेरमा प्रहरीले मृतकको शव निकालेको प्रहरीले जानकारी दिएको छ।
ट्रयाक्टर सडकबाट झन्डै ५०० मिटर तल खोलामा खसेको छ। दुर्घटनाको कारण थाहा हुन नसकेको तथा अनुसन्धान जारी रहेको जिल्ला प्रहरी कार्यालय रोल्पाले जानकारी दिएको छ।
