रोल्पामा एक जना व्यक्तिले आफैंमाथि गोली प्रहार गरी आत्महत्या गरेका छन्।
जिल्लाको रुन्टीगडी गाउँपालिका वडा नं. ६ डुव्रिङ निवासी ५१ वर्षीय कुलप्रसाद विकले आफ्नै घरभित्रै आफैंमाथि गोली हानी आत्महत्या गरेका जिल्ला प्रहरी प्रमुख दीपक खड्काले जानकारी दिए।
विकले बिहान ८ बजेतिर आफ्नै घाँटीमा गोली हानी आत्महत्या गरेका भए पनि परिवारका सदस्यले ९ बजे मात्रै प्रहरीलाई खबर गरेको डिएसपी खड्काले बताए।
‘मृतक विकले विगत केही दिन यता परिवारका सदस्यलाई ‘म मर्छु’ भन्दै तर्साउँदै आएको र सोमबार बिहान घरभित्रै भरुवा बन्दुकले हानेर आत्महत्या गरेको भन्ने खुल्न आएको छ,’ डिएसपी खड्काले भने।
गोली हाने लगत्तै विकको घरभित्रै मृत्यु भएको प्रहरीले जानकारी दिएको छ। डिएसपी खड्काले घटनाबारे अनुसन्धान जारी रहेको जानकारी दिए ।
