रुकुम (पश्चिम)मा भएको एउटा जिप दुर्घटनामा परि बुवा-छोरीको मृत्यु भएको छ।
बाफिकोट गाउँपालिका वडा नं. ३ दहखोलामा दसैँको दिनमा भएको जिप दुर्घटनामा परि घाइते भएकी ५ वर्षीया पार्वती विकको पनि उपचारको क्रममा मृत्यु भएको हो।
यसअघि नै आठबीसकोट नगरपालिका वडा नं. १ स्यालाखादी निवासी उनका बुवा २८ वर्षीय टेकमान विकको मृत्यु भइसकेको थियो। टेकमान आफैंले जिप चलाएका थिए। टेकमानले चलाएको लु १ ज २६६८ नं. को जिप बाफिकोट गाउँपालिका वडा नं. ३ दहखोलामा शुक्रबार बेलुकी दुर्घटनामा परेको जिल्ला प्रहरी प्रमुख एवं प्रहरी नायव उपरीक्षक सुमित खड्काले जानकारी दिए।
उक्त जिपका चालकसमेत रहेका टेकमान छोरीसहित नेपाने भन्ने स्थानमा रहेको ससुरालीतर्फ जाँदै गर्दा उक्त दुर्घटना भएको खड्काले जानकारी दिए।
जिप सडकबाट झन्डै २ सय मिटर तल खस्दा बुवाको घटनास्थलमै मृत्यु भएको थियो भने गम्भीर घाइते अवस्थामा उद्धार गरिएको भए पनि छोरीलाई रुकुम (पश्चिम) बाट दाङ हुँदै नेपालगञ्ज लैजाने क्रममा सोही दिन राति बाटो मै मृत्यु भएको प्रहरीले जानकारी दिएको छ।
