दाङको करिब १० मिटर गहिराइ भएको कृत्रिम तालमा डुबेर बेपत्ता भएका एक युवालाई दिनभर गोताखेरले खोज्दा पनि फेला पार्न सकेनन्।
घोराही उपमहानगरपालिका वडा नम्बर १५ बस्ने १८ वर्षीय लक्ष्मण डिसी आइतबार दिउँसो तालमा डुबेका थिए। घोराही उपमहानगरपालिका वडा नम्बर १७ गुलरिया गाउँमा गत साल घोराही उपमहानगपरपालिकाले कृत्रिम ताल निर्माण गरेको थियो। त्यही तालमा नुहाउन भनि पसेका डिसी डुबेर बेपत्ता भएको हुँदा तीन दिनदेखि खोजी भइरहेको जिल्ला प्रहरी कार्यालय दाङका प्रमुख एवम् एसपी बेलबहादुर पाण्डेले जानकारी दिए ।
दुई दिनसम्म दाङमै उपलब्ध नेपाली सेना, सशस्त्र प्रहरी, नेपाल प्रहरी र स्थानीय पौडीबाजहरूले बेपत्ता डिसीलाई खोज्ने प्रयास गरेका थिए । तर त्यो संभव नभएपछि प्रहरीले गृहमन्त्रालयलाई आग्रह गरेर कुलिनटारबाट दुईजना तालिम प्राप्त गोताखोर दाङमा बोलाएको थियो। सशस्त्र प्रहरीमा कार्यरत ती दुईजना गोताखरले मंगलबार विहान ९ बजेदेखि बेलुका ५ बजेसम्म रवर बोटको प्रयोग गरी खोज्दा पनि डिसीलाई फेला पार्न नसकिएको प्रहरीले जानकारी दिएको छ ।
‘गोताखोरले दिनभर खोज्दा पनि सफलता प्राप्त भएन,’ एसपी पाण्डेले भने।
तालमा हिलो र पानीको मात्रा धेरै रहेको हुँदा खोजीमा समस्या भएको उनले बताए ।
पीडित र स्थानीयले भने खोजीमा स्थानीय सरकारले समयमै गम्भिरता नदेखाएको भन्दै तालमै नारावाजी गरेका थिए । ‘पहिलो दिन नै तालको डिल फोडौं भन्दा मेयरले माछा भाग्छन् भनेर फुटाउन हुँदैन भने’, एकजना स्थानीयले भने ‘त्यसपछि त्यहाँ उपस्थित स्थानीय माछा ठूलो कि मान्छे ठूलो भन्दै मेयरविरूद्ध नारावाजी गरेका हुन्।’
यसैबीच प्रहरीले डिसीसँगै क्रिकेट खेल्न गएका उनका साथीहरूलाई सोधपुछका लागि नियन्त्रणमा लिएको बताएको छ।
अबको विकल्प
अब ताल पुरै सुकाउने तयारी भइरहेको छ। दाङका प्रहरी प्रमुख पाण्डेले रातभरि पम्पिङसेट र मोटर चलाएर भए पनि बुधबार बिहानसम्ममा तालको पानी सबै सुकाउने गरी प्रयास भइरहेको बताए। नजिकै रहेको एउटा तालको डिल भत्काउँदा समेत पानी सुकेको छैन ।
‘डुबेको तालमा सानो तिनो खोलो जत्रै पानी बग्छ, त्यसैले समस्या भएको छ,’ एसपी पाण्डेले भने ‘ तर,आज रातरभर थप क्षमताका पम्पिङसेट र मोटर थप्दैछौं र रातभर पानी सुकाउँछौं।’
आइतबार दिउँसो साथीहरूसँग क्रिकेट खेलेर सकेपछि १८ वर्षीय लक्ष्मण डिसी र उनका साथी नुहाउन भनि तलाउमा पौडी खेल्न गएका थिए। अरु साथीहरु उत्रन सफल भएपनि डिसी भने तालमा डुब्न पुगेको प्रहरीले जानकारी दिएको छ ।
