दाङमा मोटरसाइकल दुर्घटनामा परी एक जनको मृत्यु भएको छ भने थप दुई जना घाइते भएका छन्।
दाङ देउखुरीको गढवा गाउँपालिका वडा नं. –७ मानपुरमा भएको मोटरसाइकल दुर्घटनामा परी स्थानीय १९ वर्षीय दिनेश चौधरीको मृत्यु भएको दाङका प्रहरी प्रमुख एवं एसपी बेलबहादुर पाण्डेले जानकारी दिए।
गम्भीर घाइते चौधरीको उपचारको क्रममा गएराति लमही अस्पतालमा मृत्यु भएको थियो। तीन जना सवार मोटरसाइकलमा पछाडि बसेका दुई जना गम्भीर घाइते भएका छन्। घाइते हुनेहरूमा सोही ठाउँकै १८ वर्षीय रोशन चौधरी र १७ वर्षीय महेश चौधरी रहेको प्रहरीले जानकारी दिएको छ।
घाइते दुबै जनालाई लमही अस्पतालमा प्रारम्भिक उपचारपछि थप उपचारको लागि गएराति नै बाँकेको कोहलपुरस्थित मेडिकल कलेजमा ‘रेफर’ गरिएको प्रहरीले जानकारी दिएको छ।
लमहीको बेला भन्ने भन्ने ठाउँबाट गढवा जाने क्रममा उनीहरू बेलुका सवा ७ बजेतिर मानपुरमा दुर्घटनामा परेका थिए। तीव्र गतिका कारण मोटरसाइकल अनियन्त्रित भएर दुर्घटनामा परेको प्रहरीले जानकारी दिएको छ।
