पटक-पटकको निर्देशन विपरित भवन निर्माणमा असावधानी अपनाएको भन्दै बीमा समिति भवन निर्माणस्थलको जेसीबीलाई ललितपुर महानगरपालिकाले नियन्त्रणमा लिएको छ।
बारम्बार सूचना प्रकाशित गरि निर्माण सामाग्री ओसारपसारमा सावधानी अपनाउन सचेत गराए पनि नमानेकाले आफूहरूले बाध्य भएर निर्माण कार्यमा संलग्न जेसीबी नियन्त्रणमा लिएको ललितपुर महानगरपालिकाका मेयर चिरीबाबु महर्जनले जानकारी दिए।
मेयर महर्जनका अनुसार ललितपुर महानगरपालिका वडा नम्बर १, कुपण्डोलमा निर्माणाधीन बीमा समितिको भवनका लागि निर्माण समाग्री ओसार पसारमा व्यापक असावधानी अपनाएको, सडक सतहमा अनावश्यक फोहोर थुपारेको, फोहोर मैलाका कारण स्थानीयको दैनिकीमा प्रभावित भइ गुनासो आएकाले महानगरले कारबाहीको दायरामा ल्याएको हो।
‘यसअघि पटक-पटक पत्राचार र मौखिक निर्देशन दिँदासमेत नमानेकाले र थप फोहोर उत्पन्न भएको, कुनै पनि सावधानी नअपनाएकाले हामीले बाध्य भएर कारबाहीको दायरामा ल्याएका हौ’, उनले भने।
महानगरलाई स्वच्छ, सफा र हराभरा बनाउने अभियानमा तोकेको कार्यक्षेत्र भित्र रहेर भवन निर्माण गर्नुपर्ने र यसका लागि न्युनतम आधार पुरा गर्नुपर्ने मेयर महर्जनले बताए।
निर्माण कार्यमा चरम लापरबाही र असावधानी अपनाएपछि महानगरले नियन्त्रणमा लिएको जेसिबीलाई प्रकिया पुर्याएर कारबाही गरिने मेयर महर्जनले बताए।
महानगर भित्र नियमकानुन विपरीत कुनै प्रकारका संरचना निर्माण गर्न नदिने र त्यसरी नियम मिचेर बनाएको पाइएमा नियमानुसार कारवाही गरिने महानगरले जनाएको छ। यस्तै भवन निर्माणका क्रममा निर्माण सामाग्री सडकमा थुपारेर अनावश्यक फोहोर नगर्न समेत महानगरले पुनः सचेत गराएको छ।
यसैबीच ललितपुर महानगरपालिकाले भवन निर्माणमा नयाँ मापदण्ड लागू गरेको छ। १५ साउनदेखि लागू गरेको नयाँ मापदण्ड अनुसार अब १७ मिटर उचाइसम्म आवासीय तथा व्यापारिक भवनहरुमा संधियारतर्फ भेन्टिलेसन नराख्ने भएमा टाँसिएको भवन निर्माण गर्न दिने उल्लेख छ ।
२०७२ सालको भूकम्पपछि ललितपुर महानगरपालिकाले टाँसिएर घर बनाउन दिएको थिएन । १७ मिटर भन्नाले ५ तल्ला बुझ्नुपर्ने महानगरले जनाएको छ ।
यस्तै दुई तल्लासम्मको भूमिगत तल्ला निर्माण गर्नका लागि चारैतर्फ कम्तीमा २ मिटर र माटोको अवस्था हेरी जियोटेक्निकल इन्जिनियरले वरिपरिको सुरक्षाका लागि डिजाइन गर्ने प्रोटेक्सन सिस्टमलाई आवश्यक दुरी छोडेर मात्रै निर्माण स्वीकृत दिइने महानगरले बताएको छ ।
वस्ती विकास शहरी योजना तथा भवन निर्माण सम्बन्धी आधारभूत निर्माण दोस्रो संशोधित मापदण्ड २०७८ को संशोधन २०७९ जेठ १६ गते अनुसार महानगरले नयाँ मापदण्ड ल्याएको मेयर महर्जनले जानकारी दिए।