ललितपुर महानगरपालिकाले ७७ वर्ष कटेका नागरिकलाई १० हजार रुपैयाँ चाडपर्व भत्ता दिने भएको छ।
७७ वर्ष पूरा भएका नागरिकलाई १० हजार रुपैयाँ चाडपर्व मनाउन भत्ता दिन लागेको ललितपुर महानगरपालिकाका मेयर चिरिबाबु महर्जनका स्वकीय सचिव इन्द्र बज्रचार्यले जानकारी दिए।
उनका अनुसार पहिले ५ हजार रुपैयाँ दिने गरेको र अहिले त्यस सुविधालाई बढाइएको हो।
‘उहाँले जितेदेखि नै कार्यान्वयनमा ल्याइएको यो कार्यक्रमलाई निरन्तरता दिइएको हो,’ उनले भने, ‘पहिला ५ हजार रुपैयाँ दिने गरेकोमा अहिले सुविधा बढाएर १० हजार रुपैयाँ पुर्याइएको हो।’
ज्येष्ठ नागरिकलाई चाडपर्व मनाउन सजिलो होस् भनेर चाडपर्व भत्ता दिन लागेको उनले बताए। महानगरका अनुसार उक्त रकम एकमुष्ट रूपमा दिइनेछ।
‘ज्येष्ठ नागरिकलाई चाडपर्व मनाउन सन्तानसँग हात थाप्नु नपरोस्,’ उनले भने, 'उहाँहरूले चाडपर्वमा दक्षिणा दिँदा पनि छोरा बुहारीहरूसँग हात थाप्न नपरोस् भन्ने हो। यसो गर्दा उहाँहरू पनि खुसी हुनुहुन्छ।’
ललितपुर महानगरपालिकामा प्रवक्ता राजु महर्जनले ७७ वर्षमाथिका १५ सयभन्दा बढी ज्येष्ठ नागरिक भएको बताए।
‘महानगरमा १५ सयभन्दा बढी ज्येष्ठ नागरिक छन्,’ महर्जनले भने, 'उनीहरूलाई १० हजार रुपैयाँका दरले एकमुष्ट रकम प्रदान गरिनेछ।’
महानगरले यसको लागि २० करोड रुपैयाँ बजेट छुट्याएको महर्जनले बताए।
(सम्पादकीय नोटः यसअघि चिरिबाबुका स्वकीय सचिवसँग कुरा गर्दा उनले ७० वर्ष भने तर पछि पुनः सच्याई ७७ वर्ष बताएका हुन्।)
