बैतडीमा मिनी ट्रक दुर्घटना हुँदा एक जनाको मृत्यु भएको छ भने दुई जना घाइते भएका छन्।
बिहीबार साँझ दोगडाकेदार गाउँपालिका-२ कफलकोटमा सु.प.प्र. ०२–००१ क ०७३४ नम्बरको मिनी ट्रक दुर्घटना भएको हो। छड र सिमेन्ट बोकेर जाँदै गरेको ट्रक अनियन्त्रित हुँदा सडकबाट ५० मिटर तल खसेको छ।
दुर्घटनामा सुर्नया गाउँपालिका- ६ घर भई हाल कञ्चनपुरको शुक्लाफाँटा नगरपालिका ४ बस्दै आएका ३० वर्षीय जगदीश अवस्थीको मृत्यु भएको छ। मृतक अवस्थी ट्रकका साहु समेत थिए।
त्यस्तै सुर्नया गाउँपालिका- ६ मूलखटाली घर भएका चालक ३८ वर्षीय अमर अवस्थी र ट्रकमा सवार कञ्चनपुरको शुक्लाफाँटा नगरपालिका ४ घर भएका राजेन्द्र राना घाइते भएका छन्।
जिल्ला प्रहरी कार्यालय बैतडीका सूचना अधिकारी प्रहरी निरीक्षक बलराम पाण्डेका अनुसार घाइतेलाई उपचारका लागि डडेल्धुरा अस्पताल पठाइएको छ।
