लुइस स्वारेजको चार गोलको मदतमा बार्सिलोनाले स्पोर्टिङ गिजोनमाथि फराकिलो जित दर्ता गरेको छ।
गएराति भएको खेलमा लुइस स्वारेज एक्लैले चार गोल गरेपछि बार्सिलोनाले स्पोर्टिङ गिजोनलाई ६–० गोल अन्तरले पराजित गरेको हो। स्वारेजले पछिल्ला दुई खेलमा गरी ८ गोल गरेका छन्।
बार्सिलोनाले खेलको १२ औँ मिनेटमै लियोनल मेसीको गोलबाट अग्रता लिएको थियो। पहिलो हाफमा एक सून्यको अग्रता लिएको बार्सिलोनाले दोस्रो हाफमा भने पाँच गोल गर्यो। खेलको ६३ औँ मिनेटमा लुइस स्वोरेजले गोल गर्दै टोलीको अग्रता दोब्बर पारे।
यस्तै ७४ मिनेटमा बार्सिलोनाले पेनाल्टी पायो र त्यसका स्वारेज चुकेनन् भने ७७ औँ मिनेटमा पेनाल्टीमार्फत नै गोल गर्दै स्वारेजले ह्याट्रिक पूरा गरे।
यस्तै खेलको ८६ औँ मिनेटमा नेमारले गोल गर्दै टोलीलाई ५–० को अग्रता दिलाए भने ८८ औँ मिनेटमा फेरि लुइस स्वारेवले नै गोल गर्दै बार्सिलोनालाई ६–० को जित दिलाए।
जितपछि बार्सिलोना ३५ खेलबाट ८२ अंकका साथ शीर्ष स्थानमा कायमै छ भने समान खेलबाट ८२ अंक नै जोडेको एथ्लेटिको मड्रिड गोल अन्तरका आधारमा दोस्रो स्थानमा छ। तेस्रो स्थानमा रहेको रियल मड्रिडको समान खेलबाट ८१ अंक छ।
