मुस्लिम सुकुम्वासी आयोगको नामबाट सप्तरीमा सर्वसाधारणसँग रकम ठगी गर्ने दुई व्यक्तिलाई प्रहरीले पक्राउ गरेको छ।
इलाका प्रहरी कार्यालय कञ्चनपुरबाट खटिएको प्रहरी टोलीले मुस्लिम सुकुम्वासी आयोगको म उपाध्यक्ष हुँ भनी सर्वसाधारणबाट रकम ठगी गर्ने सप्तरीको दिगुवा–३ का ४५ वर्षीय तफेजुल मोहमद र सप्तरीकै डाँडा–५ का २८ वर्षीय अब्दुल रहमानलाई प्रहरीले बुधबार पक्राउ गरेको प्रहरी निरीक्षक गौरव महतले बताए। उनीहरुलाई घरबाटै पक्राउ गरिएको प्रहरीले जनाएको छ।
पक्राउ परेका दुवै जनाले सप्तरीको छुट्टाछुट्टै गाउँघरमा गई मुस्लिम सुकुम्वासी आयोगका पदाधिकारी हाैं भनी कुवेतको सहयोगमा आएको योजनाबमोजिम दुई÷दुई ओटा घर, भान्साघर र शौचालय बनाइदिने भन्दै प्रत्येक व्यक्तिबाट दुई हजारका दरले रकम ठगी गरेको प्रहरी निरीक्षक महतले जानकारी दिए।
सो ठगीमा परेका सप्तरीको कञ्चनरुप नगरपालिकासहित जिल्लाको डेढा गाविसका करिब एक दर्जन व्यक्तिले इलाका प्रहरी कार्यालयमा दुवै जनाविरुद्ध उजुरी दिएपछि पक्राउ गरिएको बताइएको छ। पक्राउ परेका दुवै जनालाई जिल्ला अदालत राजविराजबाट सात दिनको म्याद थप गरी इलाका प्रहरी कार्यालयमा राखिएको प्रहरीले बताएको छ। रासस
