नेपालगन्जमा ए डिभिजन स्तरको फुटबल प्रतियोगिता बिहीबारदेखि सुरु हुँदैछ। ए डिभिजन फुटबलको आयोजनासंगै नेपालगन्ज–११ को पनि पुनरागमन भएको छ।
यति सिमेन्ट गोल्डकप सिमेन्ट प्रतियोगिता अन्तर्गत बिहीबारको उद्घाटन खेल नेपालगन्ज ११ र सुदूरपश्चिम ११ बीच हुनेछ। ‘केही अनुभवी र युवा खेलाडी’लाई समाबेश गरेर नेपालगन्ज–११ टिम गठन गरिएको छ।
मध्य तथा सुदूरपश्चिमका लागि ए डिभिजनस्तरको यो पहिलो फुटबल प्रतियोगिता हो। त्यसैले खेलाडी मात्र नभइ दर्शकसमेत उत्साहित भएका छन्।
बाँके जिल्ला फुटबल संघका अध्यक्ष भोजराज शाहीले फुटबल क्रेज बढाउन र पश्चिम क्षेत्रमा पनि राष्ट्रिय स्तरका खेलहरू हुने वातावरण बनाउन नेपालगन्ज गोल्ड कप आयोजना गर्न लागिएको बताए।
गोल्डकपपछि फुटबल वातावरण बन्ने अपेक्षा गरिएको छ। यति सिमेन्ट प्रायोजक रहेको नेपालगन्ज गोल्डकप वैैशाख १६ देखि २३ सम्म संचालन हुने छन्। प्रतियोगितामा ‘ए’ डिभिजनका सरस्वती क्लब, एपीएफ र नेपाल आर्मी क्लब प्रतिस्पर्धा गर्दै छन्।
त्यस्तै, वेस्ट काठमाडौं एफसी, सुदूरपश्चिम ११, रूपन्देही ११, नेपालगन्ज ११ र भारतको लखनउ टिम सहभागी हुने अध्यक्ष शाहीले बताए। प्रतियोगिताको तयारी पुरा भएको उनले बताए।
