गत वैशाख २३ गते महेन्द्रनगरको गल्ली नं. २ मा रहेको होटल संगममा भएको हत्याकाण्डमा फरार रहेकालाई प्रहरीले पक्राउ गरेको छ।
महेन्द्रनगरको गड्डा चौकी क्षेत्रबाट मंगलबार साँझ ५:३० बजेको समयमा डडेल्धुरा जिल्ला आलिताल गाविस वडा नं. ४ घर भई हाल वेतकोट नगरपालिका वडा नं. ७, दैजि डेरा गरि बस्ने १८ वर्षिय तारा सिंह बोहरालाई हत्याको आरोपमा प्रहरीले पक्राउ गरेको जिल्ला प्रहरी कार्यालय कंचनपुरका प्रहरी उपरीक्षक तुलसी प्रसाद अधिकारीले जानकारी दिए।
बोहरालाई भारतीय प्रहरीको सहयोगमा भारतको चण्डीगडबाट पक्राउ गरि ल्याइएको हो।
हत्या भएको राति मदिरा सेवन गरेको र मोवाईलको मेमोरी कार्डमा भएको केटिको फोटोको विषयलाई लिएर विवाद भएपछि हत्या गरेको बोहराले प्रहरीसमक्ष स्वीकारेका छन्।
प्रहरी उपरिक्षक अधिकारीले बोहरा सो होटलमा ८ दिनदेखि कामदारको रुपमा रहेको बताए।
गएको बैशाख २३ गते बोहराले संगम होटलमा काम गर्ने सहकर्मी कृष्ण विष्ट र भीम रोकायाको हत्या गरेका थिए।
त्यस्तै पदम जोशी गम्भीर घाईते भएका थिए। जोशीलाई उपचारपछि आजै महेन्द्रनगर ल्याइने प्रहरी उपरीक्षक अधिकारीले जानकारी दिए।
