सत्तारुढ दल नेकपा एमालेका सांसद्हरूले भूकम्प प्रभावितहरूले घर बनाउनका लागि अनुदान रकम नपाउनुको कारणबारे राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीलाई प्रश्न सोधेर र्याख्र्याख्ती पारेका छन्।
एमालेका सांसद्हरूले बिहीबार संसदीय दलको बैठकमा भूकम्प प्रभावितहरूलाई अनुदान रकम दिन ढिलाइ गरिएकोप्रति चर्को असन्तुष्टि जनाउँदै प्राधिकरणका प्रमुख कार्यकारी अधिकृत ज्ञवालीलाई अनेक प्रश्न सोधेका हुन्। प्रमुख प्रतिपक्षी नेपाली काँग्रेसका सांसद्हरूले भूकम्प प्रभावितहरूलाई राहत रकम नदिएको विषयमा बुधबारको संसद बैठकमा चर्को आवाज उठाएपछि एमालेले बिहीबार ढिलाइको कारणबारे प्रष्ट पार्नका लागि प्राधिकरणका प्रमुख कार्यकारी अधिकृत ज्ञवालीलाई संसदीय दलको बैठकमा बोलाएको थियो।
बैठकमा एमालेका सांसद्हरूले प्राधिकरणको काम गराइप्रति काँग्रेसका सांसद्हरूले भन्दा पनि बढी असन्तुष्टि जनाए। खासगरी भूकम्प प्रभावित क्षेत्रका सांसद्हरूले आफ्नो पार्टीको नेतृत्वमा सरकार भएका बेला भूकम्प प्रभावितहरूले घर बनाउने अनुदान पाउन नसक्दा आफूहरूलाई गाउँ जान समेत अप्ठेरो परेको बताए।
सांसद्हरूले प्राधिकरणले गत माघ महिनामा पुनर्निर्माण महाअभियान सुरू गर्दा भूकम्प प्रभावितहरूमा वर्षा पहिले नै स्थायी घरमा बस्न पाउने आशा जागेको तर घर बनाउनका लागि प्राधिकरणले अनुदान रकम नदिएपछि उनीहरूले सरकारको नियतमाथि नै प्रश्न उठाउन थालेको बताए। उनीहरूले पुनर्निर्माणमा भएको ढिलाइ र लगत संकलनमा राजनीतिकरण गरेको भन्ने काँग्रेसको आरोपमा बारेमा स्पष्ट पार्न प्राधिकरणका प्रमुख कार्यकारी अधिकृत ज्ञवालीसँग आग्रह गरे।
प्राधिकरणका प्रमुख कार्यकारी अधिकृत ज्ञवालीले लगत संकलनमा राजनीतिकरण नगरिएको बरु लगत संकलनका क्रममा घर नभत्केकाहरूले पनि भूकम्पपीडित भनेर नाम लेखाएको पाइएकाले काममा ढिलाइ भएको जवाफ दिए। उनले अनुदान वितरणमा ढिलाइ भएको स्वीकार गर्दै यसमा प्राधिकरणको कुनै दोष नरहेको बताए।
