यतिबेला सबै तिर युरो कप फुटबलको गर्मागर्मी छ। विश्वकप पछि फुटबलको सवैभन्दा ठूलो प्रतियोगिता भएकाले यसको चर्चा हुनु स्वभाविक हो। नेपाली सन्दर्भमा युवा पिढीहरूमा फुटबलको क्रेज अत्याधिक पाईन्छ। अझै नेपाली राष्ट्रिय फुटबल टोलीका खेलाडी र प्रशिक्षकलाई युरोकपले नछुने त कुरै भएन।
नेपाली राष्ट्रिय टोलीका मुख्य सदस्य अन्जन विष्ट युरोकपमा पोर्चुगललाई समर्थन गरिरहेका छन्। पहिलो खेलमा बराबरीमा रोकिए पनि पोर्चुगलले राम्रो कमब्याक गर्ने उनको विश्वास छ। अन्जन भन्छन्, ‘पोर्चुगल मन पर्नुको कारण क्रिस्टियानो रोनाल्डो हो। आफूले फुटबल करिअर सुरू गर्दैबाट मलाई रोनाल्डो मन पर्ने र उनी मेरो आदर्श फुटबलर हुन्।’
त्यस्तै अर्का राष्ट्रिय खेलाडी भरत खवास भने फ्रान्सको सर्पोटमा छन्। ‘टाईम मिलेको खण्डमा आफू सबै खेल नछुटाई हेर्छु,’ भरतले भने, ‘होम ग्राउण्ड भएकाले पनि फ्रान्सलाई यस पटक फाईदा छ। विश्वकपमा भने भरतले ब्राजिलको सपोर्ट गर्दै आएको बताए।’
विराज महर्जनको च्वाईस भरत खवाससँगै मिलेको छ। उनी पनि फ्रान्सको सपोर्टमा छन् तर, उनी फ्रान्ससँगै स्पेनलाई पनि पछ्याईरहेको बताउँछन्। ‘दुवै टीम बलिया देखिएका छन्। यी दुई मध्ये कसैले पनि उपाधि उचाल्न सक्छ। तर, खेलमा नतिजा जे सुकै पनि हुनसक्छ’, उनले भने।
‘विश्व फुटबलमा भने ब्राजिल मेरो मनपर्ने टीम हो, अञ्जनले सेतोपाटीसँग भने, ‘तर युरोकपमा ब्राजिल नभएकाले स्पेन र फ्रान्सको समर्थन गरिरहेको छु।’
प्रशिक्षक राजु शाक्यको समर्थन भने जर्मनीलाई छ। त्यसको कारण बताउँदै उनले भने, ‘हामीहरू फुटबल खेल्दा देखिनै जर्मनीलाई फलो गर्थौ, जर्मनीले नेपाली फुटबललाई पनि प्रत्यक्ष र अप्रत्यक्ष रुपमा सघाउँ पुर्याउँदै आएको छ।’ जर्मनीमा उनलाई मनपर्ने यही खेलाडी भन्ने छैन उनी भन्छन, ‘फुटबल एक टीमवर्क हो त्यसैले सवैको भूमिका महत्वपूर्ण हुन्छ।’
