आगामी वर्षदेखि हिउँदमा भारतबाट ६ सय मेगावटाभन्दा बढी विद्युत खरिद गरिने भएको छ।
नेपाल विद्युत प्राधिकरणका अध्यक्ष मुकेश काफ्लेका अनुसार हिउँदको समयमा हुन लोडसेडिङ कम गर्न भारतबाट विद्युत खरिद गरिने र वर्षा सिजनमा निर्यात गरिने गरी भारतसँग सहमति भएको हो।
विद्युत् व्यापार सम्झौता (पीटीए) लगायत ऊर्जाका अन्य विषयमा छलफल गर्न नेपाल–भारतबीच सचिवस्तरीय संयुक्त स्थायी समिति (जेएससी) बैठकमा यस्तो सहमति भएको उनले सेतोपाटीसँग बताए।
काफ्लेका अनुसार अहिले पनि ३ सय मेगावाट विद्युत भारतको विभिन्न नाकाको कनेक्सन मार्फत खरिद भइरहेको छ। त्यसमा ४ सय केबी ढल्केबर–मुजाफर प्रसारण लाइनबाट ८० मेगावटा विद्युत खरिद भइरहेको छ। त्यसमा पनि नोवेम्बर डिसेम्बरसम्म २ सय २० केबीको ढल्केवर स्टेसन मर्मत सँगै थप २ सय २० मेगावाट विद्युत खरिद गर्न दुई पक्षबीच सहमति भएको उनले बताए।
साथै अन्तरदेशीय प्रसारण लाइन गुरूयोजना अन्तर्गत सन २०३५ सम्ममा बुटवल–गोरखपुर ४ सय केभी प्रसारण लाइन निर्माणको विषयमा सहमति भएको काफ्लेले बताए।
‘उक्त लाइनबाट नेपालमा उत्पादिन विद्युत भारतीय बजारमा निर्यात गर्ने समेत सहमति भएको हो’, उनले भने ‘११ वटा विभिन्न नाकामा उच्च भोल्टेज युक्त प्रसारण लाइन निर्माणको गुरुयोजनामा समेत भारतीय पक्षले स्वीकृत गरेको छ।’
सहमति अनुरूप हिउँदमा भारतबाट थप बिजुली आयात गरेर आधारभूत रुपमा लोडसेडिङको अन्त्य गर्ने सरकारको तयारी समेत रहेको छ। नेपालमा अहिले सञ्चालमा रहेको सबै आयोजनहरुबाट हिउँदको समयमा २५ प्रतिशत मात्र विद्युत उत्पादन हुने गरेकै कारण भारतसँग विद्युत आयात गर्नुको विकल्प नरहेको उनले बताए।
साथै सरकारले आधारभूत रुपमा लोडसेडिङ अन्त्य गर्न स्वदेशी र भारतबाट समेत गरि सुख्खायाममा १ हजार ६७ मेगावाट बिजुली आपूर्ति गर्ने योजना तयार गरेको उनले बताए।
