मधेसी जनअधिकार फोरम (लोकतान्त्रिक) का असन्तुष्ट पक्ष आइतबारसम्म नयाँ पार्टी गठनको तयारीमा लागेका छन्।
त्यसका लागि असन्तुष्ट पक्षका नेताले छलफललाई तीव्रता दिएका छन्। संसदीय दलका बहुमत सदस्यको सहमति जुटाइसकेपछि उनीहरु नयाँ पार्टी निर्माण गर्न केन्द्रीय समितका प्रमुख नेताहरुसँगको छलफलमा लागेको खबर आजको कारोबारमा छापिएको छ।
पार्टीको विधाननिर्माण, नेताहरुको पोर्टफोलियो, निर्धारण तथा पार्टीको नामका विषयमा छलफल भइरहेको स्रोतले जनाएको छ।
स्रोतका अनुसार आइतबारसम्म नयाँ पार्टी गठनको तयारी छ। त्यसको तयारी गर्न गोप्य छलफलमा नेताहरु जुटेका छन् ।
पार्टी अध्यक्ष विजयकुमार गच्छदारले पार्टीका नेताहरुलाई वेवास्ता गरी सरकारमा नजाने निर्णय गरेपछि असन्तुष्टपक्षका सांसदले पार्टी फुटाएर भए पनि सरकारमा जानुपर्ने निष्कर्ष निकालेका थिए।
