इंग्लिस प्रिमियर लिगमा आर्सनलले साउथ ह्यामप्टनलाई हराएको छ। गत वर्षको उपविजेता आर्सनलले गएरातिको खेलमा इन्जुरी समयमा गोल गर्दै विजयी भएको हो। इन्जुरी समयमा सान्टी काजोलाले पेनाल्टी मार्फत गरेको गोलका कारण आर्सनलले साउथह्यामप्टनलाई २–१ ले हरायो ।
खेलमा १८ औं मिनेटमा पेट्र सेचले आत्मघाती गोल गरेपछि साउथह्यामप्टनले सुरुवाति अग्रता लिएको थियो। तर २९ औं मिनेटमा लरेन्ट कासिएल्नीले आर्सनलका बराबरी गोल फर्काए।
अन्तिम समयसम्म १–१ को बराबरी रहेको खेलमा इन्जुरी सयमा पाएको पेनाल्टीको अवसरलाई काजोलाले गोलमा परिणत गरेर आर्सनललाई जित दिलाउँदै महत्वपूर्ण तीन अंक जोडे।
यो जितसँगै चार खेलबाट सात अंक जोडेको आर्सनल छैटौं स्थानमा उक्लिएको छ । दुई अंकसहित साउथह्यामप्टन अंक तालिकाको १८ औं स्थानमा छ।
