प्रधानमन्त्री पुष्पकमल दाहालको अमेरिका भ्रमण रद्ध भएको छ। संयुक्त राष्ट्रसंघको महासभामा भाग लिन प्रधानमन्त्री दाहाल सोमबार राति अमेरिकाको न्यूयोर्क जाने तयारीमा थिए।
आइतवार राति अबेर प्रधानमन्त्री दाहालले आफ्नो अमेरिका भ्रमण स्थागित गरेको प्रधानमन्त्री निकट स्रोतले सेतोपाटीलाई जानकारी दियो। मुलुकको पछिल्लो परिस्थितिको कारण दाहालले अमेरिका भ्रमण रोकेका हुन्।
आइतवार मात्र भारतको चार दिने भ्रमण सकेर स्वेदश फर्किएका दाहालले संविधानप्रति असन्तुष्ट रहेकका दललाई वार्ताको माध्यमद्वारा संविधान संशोधन प्रक्रिया अघि बढाउन आफ्नो भ्रमण रोकेका हुन्।
सोमबार सरकारले मनाउन लागेको पहिलो संविधान दिवसमा मुलुकका प्रधानमन्त्री, सभामुख र उपराष्ट्रपति नहुने भएको थियो। तर, प्रधानमन्त्रीले आफ्नो भ्रमण रोके पनि सभामुख आजै चीन प्रस्थान गरिसकेकी छन्। यस्तै उपराष्ट्रपति पनि बाहिरै छन्।
दसैं अगाडि नै संविधान संशोधनका विषयमा मधेसी मोर्चालाई बचन दिएका दाहालले राजनीतिक समस्याको समाधानका लागि राष्ट्रसंघको महासभालाई सम्बोधन गर्ने कार्यक्रम रोकेका हुन्।
यसबारेमा प्रधानमन्त्रीले सत्ता साझेदार दल नेपाली कांग्रेसका सभापति शेरबहादुर देउवालाई समेत जानकारी गराइसकेका छन्।
देशको समस्या समाधान गर्नुनै प्रधानमन्त्रीको मुख्य प्राथमिकता रहेको भन्दै प्रधानमन्त्रीले भ्रमण रद्ध गरेपछि अब परराष्ट्रमन्त्री प्रकाशशरण महत महासभामा सहभागिता जनाउने छन्। परराष्ट्र मन्त्री महत दिल्लीबाटै अमेरिकातर्फ प्रस्थान गरिसकेका छन्।
