नेकपा एमालेका अध्यक्ष केपी शर्मा ओलीले अख्तियार दुरुपयोग अनुसन्धान आयोगले माओवादीका नेतालाई बयानका लागि बोलाउनुका पछाडि एमालेको उक्साहट रहेको बताएकाप्रति आपत्ति जनाउँदै यस्ता गैरजिम्मेवार अभिव्यक्ति नदिन प्रधानमन्त्रीलाई सचेत गराएका छन्।
प्रधानमन्त्री दाहालले नेकपा माओवादी केन्द्रको हेडक्वार्टरको मंगलबार विहान बसेको बैठकमा माओवादीका २२ जना नेताविरुद्ध मुद्दा दायर गर्न एमालेले अख्तियारलाई उक्साएको धारणा राखेको खबर आएलगत्तै ओलीले गैरजिम्मेवार अभिव्यक्ति नदिन प्रधानमन्त्रीलाई सचेत गराउका हुन्।
एमाले अध्यक्ष ओलीले मंगलबार अपरान्ह पार्टीको स्थायी समितिको बैठकमा प्रधानमन्त्रीको जिम्मेवारीमा रहेको व्यक्तिलाई अख्तियारको काममा एमालेको उक्साहट छ भनेर अभिव्यक्ति दिन नसुहाउने बताए।
अख्तियारले तत्कालीन माओवादी लडाकुहरुको शिविरभित्र भएको भ्रष्ट्राचार छानविनका लागि प्रधानमन्त्री दाहाल भारत भ्रमणमा रहेका बखत पत्रकार सम्मेलन गरेर माओवादीका नेताहरुलाई ३० दिनभित्र बयानका लागि हाजिर हुन बोलाइएको सार्वजनिक गरेको थियो।
