सरकारको नेतृत्वबाट हटेपछिको पहिलो केन्द्रीय कमिटीको बैठकमा एमाले बुधबारबाट जुटेको छ।
बुधबार सुरु भएको सातौं केन्द्रीय कमिटी बैठकमा अध्यक्ष ओलीले सुरुमा राजनीतिक घटनाक्रमको संक्षिप्त ब्रिफिङ गरे। एमाले मुख्यालय धुम्बाराहीमा देशभरबाट भेला भएका केन्द्रीय सदस्यसामू उनले एमालेविरुद्ध संगठित र योजनाबद्ध षड्यन्त्र भइरहेको ब्रिफिङ गरे।
उनको ब्रिफिङ मुख्य दुई विषयमा केन्द्रित थियो। पहिलो विषय सरकारमा हुँदा एमालेले गरेको काम र सरकारबाट हटाइएको र दोस्रो एमालेलाई तराई, भारत तथा जनजाति विरोधी पार्टीका रुपमा प्रचार गरिएकोमाथि प्रष्टिकरणमा केन्द्रीत थियो।
‘सुरुमा संविधानसभाबाट संविधान जारी हुन नदिने षड्यन्त्र भयो,’ उनले भने, ‘त्यसपछि एमाले नेतृत्वमा सरकार बन्न नदिने षड्यन्त्र भयो। हामीले यसलाई पनि चि¥यौं,’ उनले भने।
एमाले नेतृत्वमा सरकार बनेकै दिन सरकार ढाल्ने कसरत सुरु भएको उनको विश्लेषण छ।
‘संविधान कार्यान्वयन गर्न खोजेकै कारण, मुलुकलाई समृद्धिको दिशा दिएकै कारण, राष्ट्रिय स्वाभिमानको रक्षा गरेकै कारण हामी सरकारबाट हट्नु प¥यो,’ उनले आफ्नो निष्कर्ष सुनाए।
सरकार ढाल्न कसले भूमिका खेल्यो भन्ने विषयमा उनले त्यति टिप्पणी गरेनन्। तर, संविधान कार्यान्वयन रोक्न सरकार परिवर्तन गरिएको भन्दै असन्तुष्टी जनाए।
केन्द्रीय सदस्यहरुलाई सम्बोधन गर्दै अध्यक्ष ओलीले भने, ‘हामीले संविधान कार्यान्वयनको स्पष्ट तालिका बनाएका थियौं। त्यसअनुसार काम गरिरहेका थियौं। सरकार परिवर्तनपछि त्यो तालिका नमान्न सुरु भइसकेको छ।’
संविधान कार्यान्वयनको उचित गतिमा अगाडि आएन भने २०७४ माघ ७ पछि देशमा संकट र रिक्तता सिर्जना हुने उनले बताए।
प्रमुख प्रतिपक्षी दलको रुपमा एमालेले संविधान कार्यान्वयन गर्न र समयमै सबै निर्वाचन गराउन अग्रणी भूमिका खेल्न उनले बताए।
एमालेलाई कमजोर बनाउन भारत, मधेस र जनजाति तथा पहिचानविरोधी पार्टीको रुपमा प्रचार गरिएको भन्दै उनले यो भ्रम चिर्न अभियान चलाउने बताएका हुन्।
‘एमालेविरुद्ध भ्रम फिजाइएको छ,’ उनले भने, ‘ताराई विरोधी भन्ने हौवा चलाइएको छ, जनजाति र पहिचान विरोधी भन्ने भ्रम सिर्जना गरिएको छ। यो केन्द्रीय समिति बैठक सकिने बित्तिकै हामी अभियानै चलाएर यी भ्रम चिर्न लाग्ने छौं,’ एमाले अध्यक्ष ओलीले भने।
एमालेलाई भारतविरोधी पार्टीको रुपमा प्रचार गरिएको भन्दै उनले भने, ‘एमाले भारतविरोधी होइन, एमाले कुनै मुलुक विरोधी पार्टी होइन। एमाले नेपालमा स्थिरता र समृद्धि चाहने पार्टी हो। नेपालको स्वाभिमान अरु देशले सम्मान गरिदिऊन् भन्ने पार्टी हो। हामीलाई कसैको विरोध गर्नुछैन।’
