सरकारले भूकम्पपीडितलाई घर बनाउन तीन लाख रुपैयाँ अनुदान दिने भएको छ। प्रधानमन्त्री पुष्पकमल दाहालको अध्यक्षतामा सोमबार सिंहदरबारमा बसेको राष्ट्रिय पुनर्निर्माण प्राधिकरणको निर्देशक समितिको बैठकले तीन किस्तामा पीडितलाई तीन लाख रुपैयाँ दिने निर्णय गरेको हो।
प्राधिकरणका प्रवक्ता सहसचिव रामप्रसाद थपलियाले तीन आजको बैठकमा पीडितलाई तीन किस्तामा तीन लाख दिने निर्णय भएको बताए। ‘पछिल्लो किस्ताको २५ हजार रुपैयाँबाट घरधनीले बायो ग्यास, सोलार र शौचालय बनाउनु पर्ने छ,’ थपलियाले भने।
थपलियाका अनुसार आजको बैठकले भूकम्पप्रभावित १४ जिल्लामा समन्वय समितिको सचिवालय बनाउने निर्णय पनि गरेको छ।
बैठकमा प्रधानमन्त्री दाहालले दश दिनभित्र परामर्श बैठक बोलाउन र एक महिनाभित्र निर्देशक समितिको बैठक बोलाउन निर्देशन दिएको थपलियाले बताए।
यसअघि सरकारले भूकम्पपीडितलाई दुई लाख दिने बताएको थियो। त्यसमध्ये करिब ४ लाखको पहिलो किस्ताको पचास हजार बैंक खातामा जम्मा भएको प्राधिकरणले जनाएको छ।
