दसैंको अवसरमा पोखराको प्रसिद्ध धार्मिकस्थल विन्ध्यवासिनी मन्दिरमा नवदुर्गा महोत्सव सुरु भएको छ। नवरात्रीको नौ दिनसम्म चल्ने महोत्सव सुरुवातको अवसरमा घटस्थापनाको दिन शोभायात्रा निकालिएको छ।
विन्ध्यवासिनी मन्दिर परिसरबाट सुरु भएको शोभायात्रा मोहरियाटोल, भैरवटोल, भिमसेन टोल, नालाको मुख, तेर्सापट्टी, महेन्द्रपुल, चिप्लेढुङ्गा, सिद्धार्थचोक , रामकृष्णटोल, गणेशटोल हुँदै पुनः मन्दिरमा पुगेर महोत्सवमा परिणत भएको हो।
शोभायात्रामा नवदुर्गाको ९ रुपको झाँकी, एकसय आठ कलश, मन्दिरको झाँकी, बिभिन्न भजन समुह, जातिय भेषभुषा, साँस्कृतिक झाँकीहरु, नेपाली सेना, नेपाल प्रहरी, शसस्त्र प्रहरी, नेपाल स्काउट, आमा समुह तथा धार्मिक, सामाजिक, शैक्षिक संघसंस्थाको सहभागिता थियो।
असोज १५ गते घटस्थापनाको दिनदेखि महानवमीको दिनसम्म दैनिक भागवत कथा बाचन हुने विन्ध्यवासिनी धार्मिकक्षेत्र विकास समितिका सचिव तीर्थ श्रेष्ठले जानकारी दिए।महोत्सब अवधिभर करिब डेढ लाख दर्शनार्थी भित्रने अपेक्षा गरिएको छ। नवरात्रीभर बिहान साढे ४ बजेदेखि साँझ ८ बजेसम्म मन्दिर दर्शनको लागि खुल्ला राखिने छ।
