अनसनरत डाक्टर गोविन्द केसीले चिकित्सा शास्त्र अध्ययन संस्थानका डिनलाई चिठी लेखेर एमबिबीएस र बिडिएसमा भर्ना रोक्न भनेका छन्। आइओएमले मेडिकल काउन्सिललाई वेवास्ता गर्दै मेडिकल कलेजमा सिट संख्या निर्धारण गरि भर्ना गर्न कलेजहरुलाई अनुमति दिएपछि डाक्टर केसीले आपत्ति जनाउँदै आइतबार चिठि लेखेका हुन्।
सिटसंख्या र शुल्क निर्धारणमा मनपरी गरिएको भन्दै डाक्टर केसीले त्रिभुवन विश्वविद्यालयका कुलपति तथा प्रधानमन्त्री पुष्पकमल दाहाल, सहकुलपति तथा शिक्षा मन्त्री धनिराम पौडेल र उपकुलपति तिर्थ खनियालाई बोदार्थ दिएका छन्।
'यसपछाडि निर्णय गर्दा सम्झौता र राज्यको नीति, निर्णयलाई पालना गर्दै तोकिएबमोजिम शुल्क लिने, सिट निर्धारण गर्ने र ओपन हाउस काउन्सेलिंगमार्फत मेरिट सुची बनाएर मात्र भर्ना लिन तथा विभिन्न पक्षहरुसँग साँठगाँठ गरी अभिभावकहरुको अरबौं रुपैयाँ अवैध रुपमा मेडिकल कलेजहरुलाई दिलाउने काम रोक्नुहुन ध्यानाकर्षण गराउँछु।' डाक्टर केसीको चिठीमा उल्लेख छ।
