नोभेम्बरमा पाकिस्तानको इस्लामावादमा हुने भनिएको सार्क (दक्षिण एसियाली क्षेत्रीय सहयोग संगठन)को १९ औं शिखर सम्मेलन स्थगीत भएको बारे नेपालले आइतबार जारी गरेको विज्ञप्तिलाई भारतीय मिडियाले नेपालले पाकिस्तानलाई एक्ल्याउन भारतीय नीतिमा साथ दिएको रूपमा अथ्र्याएका छन्। सोमबार प्रकाशित भारतीय समाचार पत्रमा परराष्ट्र मन्त्रालयले आइतबार जारी गरेको विज्ञप्तिले सार्कबाट पाकिस्तानलाई एक्ल्याउने भारतीय नीतिमा सहयोग पुगेको बताएका छन्।
भारतीय समाचार पत्र ‘इण्डियन एक्सप्रेस’ले भारतीय विदेश मन्त्रालयले सार्कका सदस्यलाई पाकिस्तानको सीमा क्षेत्रमा सर्जिकल आक्रमण गर्नुभन्दा एक दिन अगाडि सेप्टेम्वर २७ मा फोनमार्फत् सम्मेलन स्थगन गर्न आग्रह गरेको बताएको छ। आफूले सहभागी नहुने घोषणा गरेलगत्तै अन्य मुलुकले पनि यस्तै आशय व्यक्त गरून् भन्ने भारतीय चाहना थियो। सबैभन्दा पहिला अफगानिस्तानले आफू पनि सार्क शिखर सम्मेलनमा भाग नलिने बताएको थियो। पछि भुटान, बंगलादेश र श्रीलंकाले पनि सम्मेलनमा सहभागी नहुने बताएको इण्डियन एक्सप्रेसले उल्लेख गरेको छ।
‘टाइम्स अफ इन्डिया’ले नेपालले पाकिस्तानलाई एक्लो पार्ने भारतीय कुटनीतिक कदमलाई समर्थन गरेको बताएको छ। सो पत्रिकाले नेपालले छिमेकीलाई समर्थन गरेको समेत उल्लेख गरेको छ। गत सेप्टेम्वर १८ मा कश्मिरको युरीमा सैन्य क्षेत्रमा भएको आक्रमणमा आफ्ना १७ जना सैनिकहरुको मारिएपछि भारतीय प्रधानमन्त्री नरेन्द्र मोदीको नेतृत्वमा बसेको उच्च स्तरको बैठकले पाकिस्तानलाई सबै प्लेटफर्ममा एक्लो पार्ने नीति लिएको थियो।
गृहमन्त्री राजनाथ सिंहले पाकिस्तान आतंकवादलाई प्रसय गर्ने मुलुक भएकाले उसलाई एक्ल्याउनु पर्ने सार्वजनिक अभिव्यक्ति दिएका थिए।
भारत–पाक तनाव चुलिएपछि परराष्ट्र मन्त्रालयले गत बुधबार पहिलो विज्ञप्ति निकालेर सबै सदस्य राष्ट्रले सार्क शिखर सम्मेलन आयोजना गर्न वातावरण बनाउन भूमिका खेल्नुपर्ने बताएको थियो। दुई दिनपछि फेरि विज्ञप्ति निकाल्दै परराष्ट्रले सम्मेलन आयोजना गर्न आयोजक पाकिस्तानले वातावरण बनाउनु पर्ने बताएको थियो। पाकिस्तानले गत शनिबार सम्मेलन स्थगीत भएको सार्क अध्यक्ष नेपाललाई जानकारी गराएको थियो। परराष्ट्रले आइतबार जारी गरेको तेस्रो विज्ञप्तिमा सार्क सम्मेलन स्थगीत भएकोमा दुःख व्यक्त गर्दै सम्मेलन आयोजना गर्न पहल गर्ने बताएको थियो।
विज्ञप्तिमा भारतको युरीमा भएको आतंकवादी हमलाको भत्र्सना गरिएको कुरा स्मरण गरिएको थियो। सो विज्ञप्तिमा नेपालले भारतका सैनिक मारिएकोमा भत्र्सना गरेको तर सर्जिकल स्ट्राइकमा मारिएका पाकिस्तानी सैनिकका बारेमा मौन बसेको भन्दै नेपालभित्र सामाजिक सञ्जाल प्रयोगकर्ताले आलोचना गरेका छन्।
