भारत र पाकिस्तानबीच तनाव बढ्दै जाँदा पाकिस्तानी आतंकवादी संस्था लस्कर-ए-तोईवाले भारतविरुद्ध धम्की दिएको पत्र बोकेको परेवालाई भारतले नियन्त्रणमा लिएको छ। भारतको सिमा सुरक्षा बलले उक्त परेवालाई पाकिस्तानसँगको सिमा नजिकै पंजावको पाठनकोटबाट सोमबार नियन्त्रणमा लिएको हो।
‘हामीले उक्त परेवालाई हिजो साँझ नियन्त्रणमा लिएका हौँ,’ पठानकोटका प्रहरी इन्स्पेक्टर राकेश कुमारले भने। कुमारका अनुसार परेवाले बोकेको उक्त पत्र उर्दु भाषामा लेखिएको थियो – मोदी, हामी सन् १९७१ का मानिस होइनौं, अहिले बच्चा-बच्चा भारतविरुद्ध लडाइँ गर्न तयार छन्।
सन् १९७१ मा भारत र पाकिस्तानबीच पूर्ण युद्ध भएको थियो।
उक्त पत्रमा पाकिस्तानको आतंकवादी संस्था लस्कर-ए-तोईवाले हस्ताक्षर गरेको बताइएको छ। ‘त्यसैकारण हामीले यसलाई गम्भीरतापूर्वक छानिविन गर्दैछौं,’ कुमारले भने।
केही समयअघि पनि पंजावमा दुइवटा बेलुन भेटिएको थियो जसमा पनि भारतविरुद्ध धम्कीपूर्ण भाषा लेखिएको थियो।
पंक्षीहरु भारत-पाकिस्तानको तनावमा बारम्बार मुछिने गरेका छन्। गत वर्ष पाकिस्तानले आफू विरुद्ध जासुसी प्रयोजनका लागि परेवा प्रयोग गरेको भन्दै भारतीय प्रहरीले एउटा परेवा पक्राउ गरेर अनुसन्धान गरेको थियो।
सन २०१३ मा भारतीय सुरक्षा फौजले जासुसी क्यामरा जडान गरेको एक मृत बाज फेला पारेको थियो। त्यस्तै सन् २०१० मा उसले अर्को परेवालाई नियन्त्रणमा लिएको थियो।
