व्यवस्थापिका संसदमा मंगलबार अनसनरत् वरिष्ठ चिकित्सक गोविन्द केसीलाई अनसनमा एक्लै छोडेर कसरी दसैं मनाउने भनेर प्रश्न सोध्ने सांसद पनि एकै जनामात्र भए।
दसैंको मुखमा अन्तिमपटक मंगलबार बसेको बैठकमा सांसदहरुलाई धारणा राख्न शून्य र विशेष दुबै समय छुट्याइएको थियो। बिहान सवा ११ बजेदेखि बसेको बैठकमा डेढ दर्जन सांसदले बोले।
वरिष्ठ चिकित्सक केसीको माग त्यही व्यवस्थापिका संसद परिधिभित्र गुज्रिरहेको छ। आइतबारको बैठकबाट डा. केसीको माग सम्बोधन हुने आशा राखिएको थियो।
तर, व्यवस्थापिका संसदमा डा. केसीको मागबारे सांसद अमनलाल मोदी एक्लै मात्र चिन्तित देखिए। सभामुख ओनसरी घर्तीमगरले उनको ध्यानाकर्षणलाई महत्व दिइनन्।
त्यसैले, डा. केसीको माग अब दसैंभन्दा पर सरेको छ। सम्भवतः असोज ३० गते संसद बैठक बस्ने बस्ने छ।
सत्तारूढ दल नेकपा माओवादी केन्द्रका सांसद मोदीले नवौं पटकसम्म अनशन बस्दा पनि केसीका माग सम्बोधन नगरिनु दुर्भाग्य भएको बताए।
सांसद मोदीले केसीसँग किस्ताबन्दीमा सम्झौता गर्ने तर माग पूरा नगर्ने काम आपत्तिजनक भएको तर्क गरे। ‘हामी संसदमा लोकतन्त्र र मानवअधिकारका कुरा गरेर थाक्दैनौं। तर, न्याय र निष्ठाका लागि लडेको एउटा चिकित्सकको माग पूरा नहुनु यो कस्तो लोकतन्त्र हो?,’ मोदीले प्रश्न गरे।
‘गणतन्त्र आयो संविधान आयो तर पनि शान्तिपूर्ण तवरले गरिने संघर्षलाई बेवास्ता भइरहेको छ,’ उनले भने, ‘एउटा निष्ठावान व्यक्तिलाई अनसनमा छोडेर हामी कसरी दसैं मनाउन सक्छौ?’
केसीले माग गर्दै आएको चिकित्सा शिक्षा नीति विधेयक व्यवस्थापिका संसदमा पुगेर छलफलका लागि भन्दै रोकिएको छ। आठौंपटक अनसन तोड्दा आफूसँग भएका सम्झौता पूरा गर्न ढिला गरेको भन्दै डाक्टर केसी नवौंपटक अनसनमा बसेका छन्।
चिकित्सा शिक्षा नीति विधेयक संसदको यही अधिवेशनबाट पारित हुनुपर्ने, अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीलाई महाअभियोग लगाउनुपर्ने, चिकित्सा शिक्षा अध्ययन संस्थान (आइओएम)मा वरिष्ठताका आधारमा डिन नियुक्ति गर्नुपर्नेलगायत माग राख्दै डा. केसी असोज १० गतेबाट अनसनमा बसेका छन्।
अाइअोएममा अाठ महिनादेखि डिन नियुक्ति हुन सकेको छैन। चिकित्सा नीति अाठौंपटकको अनसन तोड्नै क्रममै यथाशीघ्र ल्याउने सरकारले प्रतिबद्धता जनाएको थियो।
अनसनको समय लम्बिँदै जाँदा डा. केसीको स्वास्थ्य पनि क्रमशः खस्किइरहेको छ। केसीको मुटुको धड्कन बढ्ने, बोल्न कठिन हुने, शरीर गल्दै गएको छ।
