पृथ्वी राजमार्गमा पहिरो खसेर सडक अवरूद्ध भएको छ। तनहुँको आबुखैरेनी ८ ऐनापहरामा बुधबार बिहान गएको पहिरोले पृथ्वी राजमार्ग भएर जाने सवारी साधनको लामो लाइन लागेको छ। बिहान आठ बजे खसेको पहिरोले राजमार्ग पूर्णरुपमा बन्द भएको तनहुँ प्रहरीले जनाएको छ ।
इलाका प्रहरी कार्यालयका अनुसार बिहान ८ बजेको समयमा खसेको पहिरो सय मिटर लामो खसेको छ। निकै ठूलो ढिस्को खसेकाले बाटो खुलाउन केही समय लाग्नसक्ने प्रहरीले जनाएको छ। प्रहरीले स्काभेटर झिकाएर बाटो पन्छाउने काम गरिरहेको छ। अहिलेकै अवस्थामा बाटो खुलाउन करिब पाँच घण्टा लाग्ने देखिएको छ। पोखराबाट काठमाडौं आउँदै गरेका यात्रु सुरेन्द्र रानाका अनुसार आफूहरू ठिक्क पहिरो जाँदाजाँदै ऐरापहरामा आइपुगेकोले जाममा अड्किएको बताए।
बाटो अवरुद्ध भएपछि गोरखा तथा पोखरा जाने तथा त्यहाँबाट काठमाडौं फर्कने यात्रु समस्यामा परेका छन् ।
