दक्षिण पर्वतको त्रिवेणीमा सञ्चालित श्रीमद्भागवत ज्ञान महायज्ञमा सांसद विकास लम्सालले आइतबार २० लाख रुपैयाँ सहयोग गरेका छन्।
आफ्नो निर्वाचन क्षेत्रअन्तर्गत पर्ने त्रिवेणीमा रहेको पैंयु बहुमुखी क्याम्पसमा स्नातकोत्तरतह र प्राविधिक विषयको पठनपाठन सञ्चालन गर्न आर्थिक स्रोत जुटाउने उद्देश्यले एक सातादेखि सञ्चालित शैक्षिक महोत्सव तथा महायज्ञमा सांसद लम्सालले उक्त रकम सहयोग गरेका हुन्।
शिक्षा क्षेत्रको विकासबाट मात्रै समाज र राष्ट्रको विकास हुने भएकाले आफूले उक्त महायज्ञमा सबैभन्दा बढी २० लाख रकम सहयोग गरेको लम्सालले बताए।
महायज्ञको सातौं दिनसम्म एक करोड ५० लाख सङ्कलन भएको आयोजकले जनाएको छ। त्यस्तै अर्का सांसद कल्पना चापागाईले तीन लाख, मेमोरियल ओभरसिज प्रालि काठमाडौँका सञ्चालक लोक अर्यालले १० लाख पाँच हजार ५५५, त्रिवेणी निवासी सन्तोष न्यौपानेले दुई लाख पाँच हजार, नरभुपाल काफ्लेले दुई लाख १२ हजार ५५५ सहयोग गरेका आयोजकले जनाएको छ ।
त्यस्तै होश्राङ्दी निवासी दलबहादुर थापा, त्रिवेणी निवासी नासु पुरणबहादुर राना गुप्तबहादुर राना, कृष्ण काफ्ले, मैसँरा तिवारी, भागीरथ बस्याल, लिला बल्लभ बस्याल, गोपीचन्द्र बस्याल, खुमबहादुर बस्याल र उरामपोखरा गाविस निवासी राधाकृष्ण तिवारीलगायतले रु एक लाखभन्दा बढी रकम सहयोग गरेको पैंयु बहुमुखी क्याम्पसका प्राचार्य हरिप्रसाद काफ्लेले जानकारी दिए।
जिल्लाको दक्षिणी भेगको शैक्षिक धरोहरका रुपमा रहेको क्षेत्रमा स्नातकोत्तर तह र प्राविधिक विषयको पठनपाठन आवश्यक रहेकाले त्यसलाई मुर्तरुप दिनको लागि आफूहरुले सहयोग गरेको सहयोग दाताको भनाइ छ। रासस
