राप्रपाको एकता महाधिवेशनमा जनलहर उर्लियो

अनिश रेग्मी

राष्ट्रिय प्रजातन्त्र पार्टीको एकता महाधिवेशनले राजधानीको प्रदर्शनी मार्गस्थित खुला सडक छपक्कै छोपेको थियो। राप्रपा र राप्रपा नेपालबीच पार्टी एकता भएपछि आयोजना भएको एकता महाधिवेशनको नारा ‘राष्ट्रियता, प्रजातन्त्र, हिन्दुत्व र आर्थिक उदारवादको जगमा समृद्ध नेपाल निर्माण गरौँ’ भन्ने रहेको छ ।

चारवर्षे कार्यकालमा गरिएको महाधिवेशनको उद्घाटन केन्द्रीय अध्यक्ष कमल थापाले दीप प्रज्ज्वलन गरी गरेका थिए। यही फागुन ९ गतेसम्म महाधिवेशन भृकुटीमण्डपमा जारी रहने छ ।

कार्यषक्रममा प्रधानमन्त्री पुष्पकमल दाहाल, प्रमुख प्रतिपक्षी दलको नेता केपी ओली, नेपाली कांग्रेसका सभापति शेरबहादुर देउवा, फोरम लोकान्त्रिकका अध्यक्ष विजयकुमार गच्छदारलगायतले सम्बोधन गरेका थिए।

राष्ट्रिय अध्यक्ष डा प्रकाशचन्द्र लोहनी, पूर्वप्रधानमन्त्री लोकेन्द्रबहादुर चन्द, वरिष्ठ नेता पशुपतिशम्शेर राणालगायतले पृथ्वीनारायण शाहको तस्बिरमा माल्यार्पण गरेर कार्यक्रमको सुरूवात भएको थियो।

पञ्चायती पृष्ठभूमि भएका नेपाली राजनीतिमा खारिएका नेताहरुको बाहुल्यता रहेको राप्रपा व्यवस्थापिका–संसद्मा चौथो ठूलो शक्तिका रुपमा रहेको छ । महाविधेशनले आगामी चार वर्षका लागि पार्टीको नयाँ नेतृत्व चयन गर्नेछ ।

उक्त पार्टीको शीर्ष नेतृत्वमा पूर्वअध्यक्षहरु लोकेन्द्रबहादुर चन्द, पशुपतिशम्शेर जबरा, डा प्रकाशचन्द्र लोहनी र कमल थापा रहेका छन्। महाधिवेशनमा भाग लिन स्वेदश तथा विदेशबाट गरी तीन हजार ३१५ प्रतिनिधिको सहभागिता रहेको छ ।

महाधिवेशनलाई सफल तुल्याउन ३०० पर्यवेक्षक परिचालन गरिएको छ । महाधिवेशनलाई भव्य र सव्य बनाउन महाधिवेशनस्थल वरपर पार्टीका झन्डा र ब्यानरबाट झकिझकाउ तुल्याइएको छ भने सुरक्षा व्यवस्थालाई कडा तुल्याइएको छ ।

नेपाली राजनीतिमा चतुर खेलाडीको उपनाम पाएका नेताहरु सम्मिलित राप्रपाले प्रजातन्त्र पुनःस्थापनापछि पनि सरकारको नेतृत्व गर्ने अवसर प्राप्त गरेको थियो ।

राप्रपाको यो महाधिवेशनलाई अरु राजनीतिक पार्टीले विशेष महत्व र चासोका साथ हेरेका छन् ।

Rastriya Prajatantra Party Mass Gathering (1)