फ्रेन्च क्लब पेरिस सेन्ट जर्मनी(पिएसजी) लाई ६–१ ले पराजित गर्न उत्कृष्ट प्रदर्शन गरेका ब्राजिली स्ट्राइकर नेइमार स्पेनिस ला लिगाअन्तर्गत आज (अाइतबार) राति को खेलमा अनुपस्थित हुने सम्भावना रहेको छ।
ला लिगाको शीर्षस्थानमा रहेको बार्सिलोना आज डेपोर्टिभो ला करुनाविरूद्ध भिड्दै छ। नेइमारको तिघ्रापछाडिको मासुमा समस्या देखिएको छ। जसका कारण उनी डेपोर्टिभोविरूद्धको खेलमा संलग्न हुने सम्भावना लगभग न्युन छ।
उनीसँगै ब्राजिली मिडफिल्डर राफिन्हो पनि टिममा समावेश हुने छैनन्। उनलाई ‘ग्यास्टिक’ को समस्या बताइएको छ।
च्याम्पियन्स लिगको दोस्रो लेगको खेलमा अन्तिम २ मिनेट भित्र दुई गोल र सर्गेइ रोबेर्टोलाई गोलको लागि अवसर निकाल्दै नेइमारले बार्सिलोनालाई क्वाटरफाइनलमा स्थान दिलाएका थिए। खेल नेपाली समयअनुसार राती ९ बजेदेखि सुरु हुनेछ।
