सरकारलाई दिएको समर्थन फिर्ता लिएका मधेसी मोर्चाका नेता र सत्तारुढ कांग्रेस-माओवादी केन्द्रसँगको बैठक बिना निष्कर्ष टुंगिएको छ।
सिंहदरबारस्थित प्रधानमन्त्री कार्यालयमा भएको बैठकमा मोर्चाले मधेसको समस्या समाधान नभइ निर्वाचनमा जानै नसक्ने पुरानो अडान कायम राख्दै बैठक बिना निष्कर्र्ष टुंगिएको छ।
बैठकबाट बाहिरिएका मोर्चाका नेता लक्ष्मणलाल कर्णले संशोधन पास नभइ निर्वाचनमा जाने वातावरण नभएको कुरा आफूले बैठकमा राखेको जानकारी गराए।
‘संशोधन पास नगरी समस्या र मधेसको समाधान नगरी निर्वाचनमा जाने वातावरण छैन। यो कसरी मिलाएर जाने हो मिलाउनुपर्छ,’ उनले भने, ‘हामी वार्ताबाट अलग भएका छैनौ, तर आन्दोलनका लागि तयार छौं। प्रधानमन्त्रीले समाधान गरी निर्वाचनमा जाउँ भन्नुभएको छ तर समाधान आएको छैन।’
यस्तै सत्तारूढ दल कांग्रेसका नेता कृष्ण सिटौलाले समस्याको समाधान हुन्छ भन्ने प्रतिक्रिया दिए।
‘प्रधानमन्त्रीले जति समस्या छन् त्यसलाई समाधान गरी अगाडि जाउँ भन्नु भयो। समाधान जसरी पनि हुन्छ,’ उनले भने।
यस्तै मोर्चाका संयोजक उपेन्द्र यादवले संविधान संशोधन नगरि मधेसको समाधान नहुने भन्दै मधेसी आदीवासी जनजातिका मुद्दा हल गरेर मात्र निर्वाचनमा जानुपर्ने जिकिर गरे।
‘स्थानीय निकायलाई प्रादेशिक निकायको मातहतमा नल्याइ जनसंख्या र स्थानीय तहको अनुपात नमिलाइ र सीमांकनको विषयलाई हल नगरी समस्याको समाधान हुन्न,’ यादवले भने, ‘अहिलेसम्म कुनै समस्याको समाधानको हल निकिएको छैन।’
समस्यालाई थाती राखेर अगाडि गए त्यसले झन उग्र रूप लिने उनले बताए। ‘समस्यालाई थाती राखेर अगाडि बढ्नु हुँदैन सबै समस्या समाधान गरेर जानुपर्छ। ’
बैठकमा प्रधानमन्त्री प्रचण्ड, उपप्रधानमन्त्री एवम् राप्रपा अध्यक्ष कमल थापा, कांग्रेस सभापति एवम् पूर्व प्रधानमन्त्री शेरबहादुर देउवा, कांग्रेस नेताहरु रामचन्द्र पौडेल, कृष्ण सिटौला, प्रकाशमान शिंह, माओवादी केन्द्रका नेता मातृका यादव, मधेशी मोर्चाका नेताहरु उपेन्द्र यादव, महन्थ ठाकुर, शरदशिंह भण्डारी, महेन्द्र राय यादव, अनिल झालगायत सहभागी थिए।
केपी ओली सरकारलाई हटाएर दाहाललाई प्रधानमन्त्री बनाउन सहयोग गरेको मोर्चाले हिजोमात्र सरकारलाई दिएको समर्थन फिर्ता लिने निर्णय गरेको थियो।
