पहिलो हाफमा २ गोलले पछि परिसकेको नतिजा उल्टउदै साल्केले युरोपा लिगको अन्तिम १६ मा आफ्नै देशको क्लब बोरुसिया मोन्चेनग्लाडलाई ‘अवे’ गोलको आधारमा पराजित गरेको छ।
दुवै जर्मनी क्लबबीचको भिडन्तमा समग्रमा ३–३ गोलको नतिजा निस्किए पनि साल्के ‘अवे’ गोलको आधारमा क्वाटरफाइनल प्रवेश गर्यो।
बोरुसियाको घरेलु मैदानमा विहिबार राती (नेपाली समयअनुसार शुक्रबार बिहान) सम्पन्न दोस्रो लेगको खेलमा आन्द्रेस क्रिस्टेन्सनले २६ र महमुद दाउदले ४५ मिनेटमा गोल गरेपछि बोरुसियाले सुरुमै दुई गोलको अग्रता लिएको थियो।
तर, दोस्रो हाफमा उत्कृष्ट पुनरागमन गरेको साल्केका लागि ५४ मिनेटमा लेयोन गोरेट्जाका र ६८ मिनेटमा नबिल बेन्टालेबले गोल फर्काएका थिए। उनले पेनाल्टीमार्फत गोल गरेका थिए। पहिलो हाफमा घरेलु टोलीका लागि नायकीय प्रदर्शन गरेका दाउदले डिबक्समा हातले बल छोएपछि साल्केले पेनाल्टीको अवसर पाएको थियो। साल्के जर्मनी लिग बुन्डेसलिगामा मोन्चेनग्लाडभन्दा २ स्थान तल छ।
यसअघि साल्केको घरेलु मैदानमा भएको पहिलो लेगको खेल पनि १–१ गोलको बराबरीमा रोकिएको थियो।
