प्लान इन्टरनेशनल नेपालले आगामी ५ वर्षभित्र आफ्ना कार्यक्रमहरुमार्फत् १० लाख बालिकामाझ पुगेर उनीहरुको जीवनमा परिवर्तनका लागि आफूलाई केन्द्रित गर्ने भएको छ । प्लान इन्टरनेशनलको ८० औं बार्षिकोत्सवको अवसरमा ललितपुरमा आइतबार आयोजित कार्यक्रममा प्लान इन्टरनेशनलले प्रत्यक्ष–अप्रत्यक्ष रुपमा आफ्ना कार्यक्रमहरु बालिका र महिलाको नेतृत्व विकासमा कार्यान्वयन गरिने जानकारी गराएको हो ।
कार्यक्रममा प्लान इन्टरनेशनल नेपालका राष्ट्रिय निर्देशक स्भेन कोपेन्स्ले दीगो विकास लक्ष्य र नेपाल सरकारको प्राथमिकतामा आधारित भएर बाल अधिकार र किशोरीहरुको समानताका लागि आफ्ना पहल र स्रोत साधन परिचालन गर्ने बताए।
प्लान इन्टरनेशनलले आफ्ना कार्यक्रमहरुमार्फत् सन् २०१७ देखि २०२२ सम्म बालबालिकाको संरक्षण र किशोरीहरुको सशक्तिकरणका लागि काम गर्न विश्वव्यापी रणनीति तय गरेको छ । विश्वभरका गरी १० करोड किशोरीहरुमाझ पुगेर उनीहरुको सिकाइ, नेतृत्व विकास, निर्णय क्षमता र समृद्धिलाई विश्वव्यापी रणनीतिले प्रमुख प्राथमिकता दिएको छ । रणनीति अनुसार प्लान इन्टरनेशनल नेपालले लिङ्गका आधारमा हुने हिंसा र विभेदजन्य तथा हानीकारक प्रचलन अन्त्यका लागि कार्यक्रमहरु केन्द्रित गर्नेछ ।
१२, बैशाख २०७२ को भूकम्पपछि तत्काल राहत र पुर्नस्थापनाका लागि सक्रियतापूर्वक काम गरिरहेको प्लान इन्टरनेशनलले अहिले शिक्षा, आवास, स्वास्थ्य, बालबालिका संरक्षण, खानेपानी लगायत क्षेत्रमा कार्यक्रम सञ्चालन गरेको छ । प्लान इन्टरनेशनलका कार्यक्रम सहयोग प्रवन्धक शुभाकर वैद्यका अनुसार भूकम्पपछि संस्थाले १ लाख १७ हजार २ सय ३० बालबालिकासहित २ लाख ८७ हजार ८ सय ४७ प्रभावित व्यक्तिलाई सहयोग गरेको छ । भूकम्प प्रभावित ६ जिल्लाहरुमा जारी १२ वटा नमुना विद्यालय निर्माणले नेपालको पुर्ननिर्माणमा सहयोग पुर्याउने जानकारी पनि दिए।
प्लान इन्टरनेशनलले २०३४ साल देखि नेपालमा पिछडिएका समुदायका बालबालिका, उनीहरुका परिवार र समुदायलाई बाँच्न पाउने अधिकार, समृद्धि, संरक्षण र सहभागिता प्रदान गर्न काम गर्दै आएको छ । यस संस्थाले बालबालिका केन्द्रित विकास कार्यक्रम नेपालमा ४५ जिल्लामा सञ्चालन गरिरहेको छ ।
बालबालिकाको अधिकार र बालिकाको समानताका लागि ७० भन्दा बढी देशमा सक्रिय मानवीय सहायता सम्वन्धि अन्तराष्ट्रिय संस्था प्लान इन्टरनेशनलको स्थापना ८० बर्षअघि भएको थियो । सन् १९३७ मा स्पेनी युद्धबाट प्रभावित भएका बालबालिकालाई खाद्यन्न, आवास र शिक्षा प्रदानका लागि बेलायती पत्रकार जोन ल्याङडन–डेभिस र शरणार्थीका लागि काम गर्ने इरिक मगरिड्जले संस्थाको शूरुवात् गरेका थिए । हरेक बर्षको मार्च २० मा प्लान इन्टरनेशनलले आफ्नो बार्षिकोत्सव मनाउँदै आएको छ ।
