धादिङ धार्के ४ की २५ वर्षीया राधिका श्रेष्ठ काठमाडौंको मख्खनगल्लीमा रहेको न्यु डालिज साडी पसलमा काम गर्थिन। उनको पसल नजिकै भक्तपुर बागेश्वरीका २८ वर्षीय प्रकाश लामिछानेको मोबाइल पसल थियो। कामकै शिलिशलामा उनीहरुबीच भेट भयाे र माया बस्यो। ३ वर्षदेखि उनीहरु प्रेमसम्बन्धमा रहेका थिए। तर अचानक राधिकाको उही प्रेमी लामिछानेले बिभल्स हत्या गरे।
कसरी भयो राधिकाको हत्या
प्रकाश लामिछानेले राधिका काम गर्ने पसलका संचालक श्यामसुन्दर गुप्ताको अपहरणको योजना बनाए। त्यसपछि गुप्तालाई राधिकामार्फत अपहरण गर्ने योजना सुनाए। राधिका पनि गुप्तालाई अपहरण गर्न राजी भइन।
राधिकासँगै प्रकाशले साथी किशोर गिरी र सरोज घोरासैनैके साथ लिए। फागुन ५ गते १ बजेतिर राधिकाले गुप्तालाई फोन गरी अर्जेन्ट काम छ भन्दै सुन्धारामा बोलाइन। राधिकाले गुप्तालाई सुन्धारामा भेटेर सनसाइन होटलमा लगिन। युवतीले आग्रह गरेपछि गुप्ता पनि होटलको कोठामा जान राजी भए।
होटलको कोठा नम्बर ४०३ मा त्यसअघि नै प्रकाश, सरोज र किशोर बसिरहेका थिए। महाशाखाका एसपी प्रकाशजंग कार्कीका अनुसार राधिकाले होटलको ढोका खोल्नासाथ ३ जना युवाले गुप्तालाई समाते। हातखुट्टा र मुखमा बाँधे।
त्यसपछि सोही दिन साँझ १० लाख ७० हजार लिएर, गुप्तालाई सोही होटलमा बन्धक बनाएर उनीहरु भागे। बसन्तपुरमा गएपछि प्रकाशले सरोज र किशोरलाई दुई दुई लाख दिए। बाँकी उनीहरुले राखे ।
त्यसपछि प्रकाश राधिकालाई लिएर भक्तपुरस्थित उनको घरमा गए। किशोर र सरोज पनि अर्को ट्याक्सी लिएर भक्तपुर नै गए।
अपहरणको पोल खुल्ने डरले राधिकालाई मार्ने योजना प्रकाशले बनाए। त्यसपछि ३ जना मिलेर राधिकाको मुख थुनेर हत्या गरे। मुख र खुट्टामा टेप लगाइदिए। मृतक शरिरलाई प्लाष्टिकको बोरामा प्याक गरेर मोटरसाइकलमा रादि घरभन्दा २ सय मिटर तल मुहानपोखरीमा गई खाल्डो खनेर पुरे।
महानगरीय अपराध महाशाखाले आज पत्रकार सम्मेलन गरी घटनामा सम्लग्न २ जना किशोर र सरोजलाई सार्वजनिक गरेको छ। मुख्य योजनाकार तर राधिकाका प्रेमी प्रकाश भने फरार छन्। प्रेमिका प्रयोग गरी ब्यापारी अपहरण गरी पोल खुल्ने डरले उनीहरुले राधिकाको विभल्स हत्या गरेको एसएसपी दिनेश अमात्यले बताए।
ब्यापारी अपहरणमा परेको जानकारी आएपछि प्रहरीले १ घन्टामा नै गुप्तालाई होटलबाट उद्धार गरेको थियो। प्रहरीले प्रारम्भिक अनुसन्धान गरेर भोलिपल्ट किशोर र सरोजलाई पनि प्रहरीले पक्राउ गरेको थियो।
'अदालतबाट मागिएको कल डिटेल पनि समयमा आइपुगेको थिएन,' महाशाखाका डिएसपी अजय केसीले भने, 'घटनामा उनीहरुको सम्लग्नता पुष्टि नभएपछि हामीले छाड्दियौं।'
'समयमा नै गुप्ता अपहरण परेकै दिन अदालतबाट कल डिटेल समयमा नै आएको भए साँझमा राधिकाको हत्या हुने थिएन,' महाशाखाका एक अधिकारीले भने, 'कल डिटेल आएको भए राधिक बच्ने सम्भावना धेरै थियो।'
पछिल्लो समय अदालतबाट अनुमति लिएपछि मात्र टेलिकम र एनसेलले प्रहरीलेलाई कल डिटेल उपलब्ध गराउँछ। यसले प्रहरीलाई काम गर्न निकै समस्या भएको अनुसन्धानमा खटिएका प्रहरीहरु बताउँछन्।
