बुटवलको दाह्री ग्याङ समूहले आर्थिक सहयोग गरेपछि जाजरकोटकी कल्पना रोका उपचारपछि अस्पतालबाट घर जान पाउने भएकी छन्। ३७ दिन पहिले घाँस काट्न जाँदा भीरबाट लडेर गम्भीर घाईते बनेकी जाजरकोट पजारू गाविस ९ की २७ वर्षीय कल्पनाको उपचार पुरा भए पनि अस्पताललाई बुझाउन रकम नभएपछि घर जान पाएकी थिईनन्।
२० दिन पहिले नै उनको उपचार पुरा भए पनि अस्पताललाई बुझाउनुपर्ने २ लाख १३ हजार रकम नभएपछि उनी अस्पतालमै बस्न बाध्य थिईन्।
सामाजिक क्षेत्रमा कृयाशिल युवाहरुको संस्था दाह्री ग्याङ समूहले घरदैलो तथा सांगितिक कार्यक्रम गरी १० रूपैया सहयोग अभियान सञ्चालन गरी कल्पनाको लागि रकम संकलन गरेका हुन् ।
समूहले मंगलबार पनि अभियान जारी राखेको र हालसम्म करिब १ लाख ३५ हजार संकलन गरेको र अरु रकम मिनाहा गर्न अस्पताललाई आग्रह गरिएको जनाएको छ। समूहका संयोजक सुरज क्षेत्रीले उपचारमा खर्च भएको रकम पत्रकार सम्मेलन गरी अस्पताललाई हस्तान्तरण गर्ने तयारी भएको बताए ।
यता उपचार खर्च नभएर निको भए पनि अस्पतालमै भन्ने समाचार सेतोपाटीमा प्रकाशित भएपछि सम्बन्धित अस्पतालसँगै जाजरकोटका सांसद तथा स्वास्थ्य मन्त्रालयले समेत चासो दिएका छन्।
मंगलबार जाजरकोटका सांसद राजेन्द्र विक्रम पाण्डेले संचारकर्मीहरुलाई सम्पर्क गरी कल्पनाको सहयोगको लागि चासो दिएका थिए। त्यस्तै स्वास्थ्य मन्त्रालयका दिलिप सुनारले अस्पतालले बिरामीहरुलाई दिनुपर्ने १० प्रतिशत छुट सेवा अन्तर्गत कल्पनाको उपचार खर्च छुट गर्नुपर्ने बताए।
स्वास्थ्य मन्त्रालयले सबै निजी अस्पताललाई विरामीहरुको उपचारमा १० प्रतिशत निशुल्क गर्न निर्देशन दिए पनि नियमनकारी निकायको वेवास्ता तथा अस्पतालको चरम लापरबाहीका कारण विरामीहरुले उक्त लाभ लिन सकेका छैनन् ।
१० प्रतिशत छुट दिने अस्पतालहरुले पनि चरम आर्थिक अभावमा रहेका कल्पनाभन्दा पनि अस्पताल सञ्चालकहरुका आफन्त, नातेदार तथा राजनितिक पहुँच पुग्नेहरुले छुट सेवाको उपयोग गर्दै आएको सर्वसाधारणको गुनासो छ ।
