सनम कुमार बैराग निर्देशित फिल्म 'कैदीको पत्र' को गीत सार्वजनिक भएको छ।
सोमबार ओएसआर डिजिटल युट्युब च्यानलमार्फत फिल्ममा समावेशी 'घरै बसुँ पिरै पिर हो' बोलको गीत सार्वजनिक गरिएको हो। अभिषेक कार्कीको स्वर रहेको गीतमा फिल्मका अभिनेता पृथ्वीराज खत्री फिचर्ड छन् भने कुनाल विश्व र ब्रिटिश अभिनेत्री म्याडिसन लाजारसलाई पनि देख्न सकिन्छ।
सनम कुमार बैरागको शब्द रहेको गीतमा विनम्र कर्माचार्यले संगीत भरेका छन्। फिल्ममा आफ्नो जीवनमा पाएको खुशीलाई सम्हाल्न नसक्दा मानिसले व्यहोर्नुपर्ने उतारचढावलाई देखाइने छ।
साहित्यकार ईश्वर मानन्धरले लेखेको कथा ‘कैदीको पत्र’ मा आधारित रही यो फिल्म बनाइएको हो।
यो फिल्मको सम्पूर्ण छायांकन स्कटल्याण्डमा गरिएको हो। फिल्ममा कुनाल र म्याडिशनसँगै सलिना थापामगर, पृथ्वीराज खत्री, सुवर्ण थापा, मनिष श्रेष्ठलगायत कलाकारको अभिनय छ। दिल घले, नानी बैराग, कैलाश विश्वकर्मा र हिराल जोशी फिल्मका निर्माता हुन्।
रामेश्वर कार्कीले छायांकन गरेको फिल्मलाई अर्जुन जिसीले सम्पादन गरेका छन्।
यो फिल्म वैशाख १५ गतेदेखि प्रदर्शन हुँदैछ।
