राजबहादुर सानेको निर्देशनमा बन्ने फिल्म 'सिटामोल' मा सौगात मल्ल र बेनिशा हमाल मुख्य भूमिकामा देखिने भएका छन्।
छायांकनमा जाने तयारीमा रहेको फिल्मको गीत रेकर्ड गरिसकेको छ। शनिबार फिल्ममा समावेश हुने ‘झुम्का कानैमा’ बोलको गीत रेकर्ड गरिएको हो।
गोविन्द भट्टको शब्द, बाबुल गिरीको संगीत तथा संगीत संयोजन रहेको गीतमा बाबुल गिरी र रोशनी श्रेष्ठ (राई) को स्वर छ।
‘सिटामोल’ मा सौगात र बेनिशासँगै बुद्धि तामाङ, ज्ञानु सुनार र ध्रुव दत्तको पनि अभिनय रहने छ। बाँकी कलाकारहरूलाई पनि चाँडै अनुबन्धित गरिने निर्देशक सानेले बताए।
‘नामले नै फिल्मको थिम प्रस्ट्याउँछ। फिल्मले नेपाली समाजमा घटिरहेको वास्तविक घटनालाई नै भन्नेछ। हरेक मानिस विभिन्न पीडामा हुन्छन्, त्यसलाई निको पार्ने सिटामोलको रूपमा फिल्म बन्नेछ,’ उनले भने।
फिल्मको कथा साने स्वयंको हो भने संवाद प्रदीप भारद्वाजले तयार पारेका छन्। फिल्ममा रमेश वन गोसाईं र श्याम थापाको लगानी रहनेछ।
यसअघि सानेले ‘वृन्दावन’, ‘वीरंगना’ र ‘सिल्ली फो’ जस्ता फिल्म निर्देशन गरिसकेका छन्।
