अभिनेता दयाहाङ राई र अभिनेत्री मिरूना मगरको मुख्य अभिनय रहेको फिल्म 'घरज्वाइँ' प्रदर्शनमा आएको छ।
आजबाट रिलिज भएको फिल्मलाई मल्टिप्लेक्स हलहरूले उच्च शो दिएका छन्। क्युएफएक्स, आईएनआई, बिग मुभिज, वान सिनेमाज, एफक्युब सिनेमाज, बिएसआर मुभिज लगायत सबैमा फिल्मले उत्साहजनक शो पाएको छ।
अनिल बुढा मगरको लेखन तथा निर्देशन रहेको यो फिल्म मगर संस्कार र संस्कृतिको कथामा बनेको छ।
फिल्ममा दयाहाङ र मिरूनासहित बुद्दि तामाङ, शिशिर वाङदेल, कविता आले, राज थापा, पुष्कर गुरूङ लगायत कलाकारको अभिनय छ।
जनक घर्ती मगर फिल्मका निर्माता हुन्।
पछिल्लो समय दयाहाङ र मिरूनाको जोडीका फिल्मले राम्रो व्यापार गरिरहेका छन्। त्यसमा पनि आदिवासी जनजाति समुदायका कथावस्तुलाई दर्शकले रूचाएका छन्। कलाकार, कथावस्तु र प्राप्त शो संख्याका आधारमा 'घरज्वाइँ' ले राम्रो व्यापार गर्ने अनुमान गरिएको छ।
शुक्रबार विदेशी फिल्म 'हिन्दुस्तानी २', 'सरफिरा' र 'लङ्लेग्स' पनि नेपाली हलमा प्रदर्शनमा आएका छन्।
