केही वर्ष अघिसम्म हिट हुनेमा फिल्मका गीत धेरै हुन्थे। पछिल्ला वर्ष भने फिल्मका गीत पहिलो जसरी चल्न छाडेका छन्।
धेरै संख्यामा फिल्मका गीत सार्वजनिक हुने गरे पनि एकाधले मात्र चर्चा कमाउने गरेका छन्। यो वर्ष फिल्मका थुप्रै गीत सार्वजनिक भइसकेका छन्। त्यसमध्ये केही गीतले मात्र स्रोता–दर्शकको मन जितेका छन्।
पछिल्लो समय 'राई माइला' बोलको गीत चर्चामा रह्यो। यो नवीन सुब्बाको निर्देशन रहेको फिल्म 'गाउँ आएको बाटो' को गीत हो।
जसका शब्द श्रवण मुकारूङका हुन्। कालीप्रसाद बास्कोटाको संगीत छ भने सुनीता थेगिमले यो गीतमा स्वर दिएकी छन्।
भिडिओमा फिल्मका कलाकारहरू दयाहाङ राई, पशुपति राई, प्रसन राई लगायतलाई देखाइएको छ। गीत सार्वजनिक भएको छोटो समयमा यसको भिडिओलाई ५१ लाख बढी पटक हेरिएको छ।
यसवर्ष प्रदर्शनमा आएका फिल्मका गीतमध्ये धेरै चर्चा पाएको गीत 'बुझिनँ मैले' हो।
यो गीत सुलक्षण भारती निर्देशित तथा केकी अधिकारी निर्मित एवं अभिनीत फिल्म 'बोक्सीको घर' को हो।
प्रकाश सपूतको शब्द, संगीत र समीक्षा अधिकारीको स्वर रहेको गीतले युट्युब, टिकटकदेखि फेसबुक रिल्ससम्म निकै ख्याती कमायो।
'बोक्सीको घर' की अभिनेत्री केकी अधिकारी फिचर्ड भिडिओले अहिलेसम्म २ करोड ९३ लाख भ्युज पाएको छ। यो गीतले फिल्मको व्यापारमा ठूलो सहयोग पुर्याएको केकी स्वयंले बताएकी छन्।
'दर्शक गरें' बोलको गीत पनि पछिल्लो समय चर्चामा रह्यो। यो गीत दिनेश राउत निर्देशित फिल्म 'पुजार सार्की' को हो। हर्क साउदको शब्द, करण राज कार्कीको संगीत रहेको गीतमा प्रकाश सपुत र शान्तिश्री परियारको स्वर छ।
फिल्मका कलाकारहरू आर्यन सिग्देल, प्रदीप खड़का, पल शाह, अञ्जना बराईली, परीक्षा लिम्बु अभिनीत भिडिओलाई अहिलेसम्म ७५ लाख बढी पटक हेरिएको छ।
