'सकम्बरी' गीतबाट उदाएकी मोडल कुसुम शर्माले म्युजिक भिडिओदेखि फिल्ममा समेत अभिनय गरिरहेकी छन्।
छोटो समयमै दुई दर्जन हाराहारी भिडिओमा मोडलिङ गरेकी उनले फिल्म 'बर एण्ड बधू' को छायांकन सकेकी छन्।
यतिबेला उनी नयाँ फिल्ममा अनुबन्धित भएकी छन्। बाबु साहेब बलामीको कन्सेप्ट र निर्देशनमा निर्माण हुन लागेको फिल्म 'माइली' मा उनी अनुबन्धित भएकी हुन्।
निर्माण टिमले कुसुमको पोस्टरलुक पनि सार्वजनिक गरेको छ। जसमा उनलाई कालो चस्मामा गम्भीर भावमा देखाइएको छ। उनको पृष्ठभूमिमा एक महिलाले केही काम गरिरहेको देख्न सकिन्छ।
यो फिल्ममा कलाकारको लाइनअप पुरा भएको छ। यसअघि प्रियंका कार्की, करिश्मा मानन्धर, कमला घिमिरे, सुष्मा लामा, अंशु महर्जन अनुबन्धित भइसकेका छन्।
निर्देशक बलामीका अनुसार सत्य घटनामा आधारित रहेर फिल्म निर्माण हुनेछ। फिल्ममा महिलाको पीडा देखाइने उनले बताए।
छिट्टै फ्लोरमा निस्किने तयारीमा रहेको फिल्मलाई मकवानपुरको वीरखर्ग, कुलेखानी, काठमाडौं र दुबईमा छायांकन गरिने जनाइएको छ।
फिल्ममा शंकर अधिकारी 'घायल' को गीत, पटकथा र संवाद तथा राजेन्द्र बजगाईंको संगीत रहनेछ। रूना इन्टरटेन्मेन्टको ब्यानरमा फिल्म निर्माण हुन लागेको हो।
