व्यवसायिक सफल फिल्म 'होस्टेल' को तेस्रो श्रृंखलाको प्रदर्शन मिति घोषणा गरिएको छ। छायांकन अगावै 'होस्टेल ३' को रिलिज मिति घोषणा गरिएको हो।
भदौ २१ गतेदेखि छायांकनमा जान लागेको यो फिल्म फागुन १६ गते विश्वभर एकसाथ रिलिज गर्ने निर्णय गरिएको निर्देशक सशान कँडेलले बताए।
फिल्ममा प्रमुख भूमिकामा 'कुल ब्वाय' अर्थात् पारस बम, रिहान गिरी, पदम तामाङ र सिम्रन पन्त अनुबन्धित भइसकेका छन्।
अब यो फिल्ममा अर्को प्रमुख भूमिकामा आशिष घिमिरेको पनि प्रवेश भएको छ। 'माग्ने बुढा' को नामबाट परिचित प्रसिद्ध कलाकार केदार घिमिरेका छोरा आशिषले बाल्यकालमा चर्चित हास्य टेलिश्रृंखला 'मेरी बास्सै' मा आफ्नै पितासँग 'धुन्धुकारी' नामक छोराको भूमिकामा अभिनय गरेका थिए।
यस्तै, 'होस्टेल ३' मा अर्की कलाकार हेना नगरकोटी पनि अनुबन्धित भएकी छन्।
थियटर पृष्ठभूमिबाट फिल्ममा प्रवेश गरेकी हेनाले एक्टर स्टुडियोमा लामो समय नाटक गरेकी छन् भने वेब सिरिजहरू 'खेल' र 'साहु बा' मा पनि अभिनय गरेकी छन्। फिल्म 'बाइरोड' मा समेत उनले अभिनय गरेकी छन्। 'होस्टेल ३' को लागि माधव शर्माले स्क्रिप्ट लेखेका छन्। यसको कथा भने निर्देशक कँडेलले नै लेखेका हुन्।
फिल्मलाई सम्मान इन्टरटेन्मेन्टले आरोन कन फिल्म्ससँगको सहकार्यमा बनाउँदै छ। यसका कार्यकारी निर्माता शंकर कोइराला हुन् भने निर्माताहरू कर्ण कार्की र गोविन्द अधिकारी हुन्। सह–निर्मातामा सुधा मरहट्ठा, सुरेश कँडेल र अर्जुन सापकोटा छन्
होस्टेलमा बसेर अध्ययन गरिरहेका टिनेजर र उनीहरूको भविष्यका घटनाहरूमा आधारित रहेर फिल्म निर्माण हुन लागेको जनाइएको छ।
